اسلام آباد یونائیٹڈ کے کپتان شاداب خان اور ملتان سلطانز کے شان مسعود اور ٹم ڈیوڈ پر اپنی ٹیم کے میچ کے دوران الگ الگ واقعات میں ضابطہ اخلاق (کوڈ آف کنڈکٹ) کی لیول 1 کی خلاف ورزی پر میچ فیس کا 10 فیصد جرمانہ عائد کر دیا گیا۔
تینوں کھلاڑیوں نے پلیئرز اور پلیئر سپورٹ پرسنل کے لیےکوڈ آف کنڈکٹ کے آرٹیکل 2.8 کی خلاف ورزی کی، جس کا تعلق "میچ کے دوران امپائر کے فیصلے پر اختلاف ظاہر کرنا” ہے۔
شاداب کے معاملے میں یہ واقعہ ملتان سلطانز کی بیٹنگ کے 20ویں اوور کی چوتھی گیند پر پیش آیا جب آن فیلڈ امپائر کی جانب سے وائیڈ بال دی گئی اور اس پر شاداب باؤنڈری لائن سے بھاگتے ہوئے آئے اور فیصلے پر غصے کا اظہار کیا۔
ملتان سلطانز کی بیٹنگ کے 14ویں اوور کی آخری گیند پر شان مسعود نے امپائر کی جانب سے شارٹ پچ گیند کے لیے اشارہ نہ کرنے پر مایوسی کا اظہار کیا۔
اسی طرح ملتان سلطانز کی بیٹنگ کے 18ویں اوور کی دوسری گیند پر ٹم ڈیوڈ نے لیگ امپائر کی جانب سے شارٹ پچ گیند کو وائیڈ ڈلیوری نہ کہنے کے فیصلے پر برہمی کا اظہار کیا۔
شاداب اور شان نے جرم کا اعتراف کیا اور میچ ریفری روشن مہاناما کی طرف سے عائد کی جانے والی پابندیوں کو قبول کر لیا جس کے بعد رسمی سماعت کی ضرورت پیش نہیں آئی۔
اس دوران ڈیوڈ نے اس فیصلے کو چیلنج کیا اور باقاعدہ سماعت کے بعد میچ ریفری نے اپنا فیصلہ برقرار رکھا۔ یہ الزامات آن فیلڈ امپائرز فیصل آفریدی اور راشد ریاض نے لگائے تھے۔
