لاہور: قومی کرکٹ ٹیم کے لیگ اسپنر شاداب خان نے کہا ہے کہ دورہ زمبابوے کے لیے کوئی پریشر نہیں ہے، سیریز کے لیے تیاری بہترین ہے، بہت کچھ سیکھنے کو مل رہا ہے۔
ان خیالات کا اظہار انہوں نے تربیتی کیمپ کے بعد میڈیا سے گفتگو کرتے ہوئے کیا، شاداب خان نے کہا کہ شروع سے ہی دو وائٹ بال سے کھیل رہے ہیں فرق نہیں پڑ رہا، میرے پاس بہت چانس ہے امید ہے نمبر ون ہوں گا۔
لیگ اسپنر شاداب خان نے کہا کہ پاکستان اے کے دو دورے کئے جس سے فائدہ ہوا، راشد خان بہت اچھے بولر ہیں، انڈر 19 ورلڈ کپ کھیلا ہے۔
شاداب خان کا کہنا تھا کہ یاسر شاہ کا کم بیک ہوا امید کرتا ہوں وہ لیڈنگ وکٹ ٹیکر ہوں گے، سلیکشن کمیٹی نے انتخاب کیا یاسر شاہ نے پرفارمنس دی ہے۔
مزید پڑھیں: دورہ زمبابوے کے لیے قومی کرکٹ ٹیم کا اعلان
واضح رہے کہ پاکستان کرکٹ ٹیم کے ساتھ زمبابوے کے دورے میں کوئی فیلڈنگ کوچ نہیں ہوگا، دورہ مختصر ہونے کی وجہ سے موجودہ کوچز سے ہی کام چلایا جائے گا، جبکہ نئے کوچ کا تقرر طویل المیعاد بنیادوں پر کیا جائے گا۔
یاد رہے کہ پاکستان، آسٹریلیا اور زمبابوے کے درمیان ٹرائنگولر ٹی ٹوئنٹی سیریز کا آغاز یکم جولائی سے ہوگا جس کا فائنل 8 جولائی بروز اتوار کو کھیلا جائے گا۔
ٹی ٹوئنٹی ٹرائنگولر سیریز کے بعد قومی ٹیم زمبابوے سے پانچ ون ڈے میچز پر مشتمل سیریز کھیلے گی جس کا آغاز 13 جولائی سے ہوگا، پانچواں اور آخری ون ڈے میچ 22 جولائی بروز اتوار کو کھیلا جائے گا۔
