ٹی 20 ورلڈ کپ کے سپر 12 مرحلے میں جنوبی افریقہ کے خلاف اہم ترین میچ میں قومی ٹیم کے نائب کپتان شاداب خان نے بھرپور لاٹھی چارج کیا۔
سڈنی میں کھیلے جا رہے میچ میں پاکستانی کپتان نے ٹاس جیت کر پہلے بیٹنگ کا فیصلہ کیا تھا تاہم بیٹنگ بری طرح لڑکھڑا گئی، کپتان بابر اعظم اور محمد رضوان ایک بار پھر ناکام ثابت ہوئے اور ڈبل فیگر میں بھی داخل نہ ہوسکے۔
آدھی ٹیم صرف 95 کے مجموعے پر پویلین لوٹ چکی تھی اور اسٹیڈیم میں پاکستانی شائقین کے اسٹینڈز میں سناٹا طاری تھا، ایسے میں قومی ٹیم کے نائب کپتان شاداب خان بلا گھماتے ہوئے پویلین سے نمودار ہوئے اور پھر اسی بلے سے ایسا لاٹھی چارج کیا کہ جنوبی افریقی بولرز کے ہاتھوں کے طوطے اڑ گئے جب کہ اسٹیڈیم میں پاکستانی شائقین کا جوش بڑھ گیا۔
شاداب خان نے آتے ہی چاروں طرف خوبصورت اسٹروک کھیلے اور صرف 20 گیندوں پر طوفانی نصف سنچری اسکور کی جس میں 4 بلند و بالا چھکے اور تین چوکے شامل تھے، وہ 22 گیندوں پر 52 رنز بنا کر آؤٹ ہوئے ان کا متاثر کن اسٹرائیک ریٹ 236.36 رہا۔
اس موقع پر آل راؤنڈر کا استقامت کے ساتھ افتخار احمد نے بھی ساتھ دیا اور دونوں کے درمیان 82 رنز کی پارٹنر شپ ہوئی جس کے لیے دونوں بلے بازوں نے صرف 35 گیندیں کھیلیں، 177 کے مجموعے پر شاداب خان کے آؤٹ ہونے کے فوری بعد افتخار احمد بھی پویلین لوٹ گئے۔ انہوں نے آؤٹ ہونے سے قبل 35 گیندوں پر 51 رنز بنائے۔
واضح رہے کہ پاکستان نے جنوبی افریقہ کو جیت کے لیے 186 رنز کا ہدف دیا ہے، پاکستان کو ٹورنامنٹ میں اپنی بقا کے لیے یہ میچ جیتنا لازمی ہے۔