پاکستان تحریک انصاف (پی ٹی آئی) کے سابق وفاقی وزیر شفقت محمود نے سیاست چھوڑنے کا اعلان کردیا۔
شفقت محمود نے سماجی رابطے کی ویب سائٹ ایکس پر جاری بیان میں کہا کہ بہت سوچ و بچار کے بعد سیاست چھوڑنے کا فیصلہ کیا ہے، سیاست چھوڑنے کا فیصلہ کسی دباؤ کی وجہ سے نہیں کیا۔
شفقت محمود نے کہا کہ میرا کسی اور سیاسی جماعت میں جانے کا ارادہ نہیں ہے، 34 سال قبل سرکاری ملازمت سے استعفیٰ دے کر سیاست میں قدم رکھا تھا، اپنی باقی عمر تحریر و تدریس کیلئے وقف کرنا چاہتا ہوں۔
انہوں نے کہا کہ یہ اعلان صرف سیاست سے علیحدگی کا ہے اور اس کا تعلق وقت اور عمر کے تقاضے سے ہے، میں ان سے مکمل اتفاق کرتا ہوں جو کہتے ہیں کے سیاست میں نوجوانوں کو آگے آنا چاہیے۔
شفقت محمود کا کہنا تھا کہ سیاست کے اس سفر کے دوران بہت سے نشیب و فراز آئے، سینیٹ اور نیشنل اسمبلی کا ممبر اور وفاقی و صوبائی وزیر رہا، جیل کی یاترا کرنے کا بھی اتفاق ہوا، مجھے اطمینان ہے کے میں نے ہمیشہ اپنی ساری ذُمّہ داریاں نہایت ایمانداری سے سرانجام دیں۔
انہوں نے کہا کہ بانی پی ٹی آئی کا مشکور ہوں جنہوں نے خدمت کا موقع دیا، 2 بار نمائندگی دینے پر پی ٹی آئی اور حلقے کے عوام کا شکر گزار ہوں اور اللہ تعالیٰ کا شکر ہے آج تک کسی نے ناجائز الزام تک نہیں لگایا۔
شفقت محمود نے مزید کہا کہ ملکی تاریخ میں پہلی باریکساں نصاب بنایا، کورونا کے مشکل وقت میں تعلیمی نظام کامیابی سے سنبھالا اس بات پر اطمینان ہے ساری ذمہ داریاں ایمانداری سے سر انجام دیں۔
شفقت محمود نے مزید کہا کہ ملک کی خدمت کا جذبہ تاحیات رہے گا، امید ہے تحریر تدریس اور میڈیا کے ذریعے یہ سفر جاری رہے گا۔
