راولپنڈی: عدالت نے شاہ محمود قریشی کا جسمانی ریمانڈ مسترد کرتے ہوئے 14 روز کا جوڈیشل ریمانڈ دے دیا۔
تفصیلات کے مطابق پولیس نے پاکستان تحریک انصاف کے رہنما شاہ محمود قریشی کو 9 مئی کے 12 مقدمات میں گرفتار کر لیا ہے، عدالت نے ان کے جسمانی ریمانڈ کی استدعا مسترد کر دی، اور چودہ دن کے جوڈیشل ریمانڈ پر اڈیالہ جیل بھیجنے کا حکم دے دیا۔
پولیس نے سابق وزیر خارجہ کو ہتھکڑیاں لگا کر پیش کیا، ڈیوٹی مجسٹریٹ سید جہانگیر علی نے شاہ محمود قریشی کی ہتھکڑیاں کھولنے کا حکم دیا، دوران سماعت سابق وزیر خارجہ نے کہا آپ قرآن پاک منگوالیں، حلف دیتا ہوں، نو مئی کو راولپنڈی ہی نہیں پنجاب میں بھی نہیں تھا، بلکہ کراچی میں تھا۔
شاہ محمود قریشی کی 12 مقدمات میں گرفتاری ڈال دی گئی
شاہ محمود قریشی کمرہ عدالت میں رو پڑے، اور کہا کہ پانچ بار ممبر اسمبلی رہا لیکن ایس ایچ او نے مجھے لاتیں اور گھونسے مارے، مجھ پر تشدد کیا، انھوں نے کہا مجھے سینے میں تکلیف ہوئی، گھنٹوں ایس پی سے درخواست کی کہ اسپتال لے جاؤ، منتیں کیں کہ مجھے سینے میں تکلیف ہے لیکن ڈاکٹر کے پاس نہیں لے جایا گیا۔
شاہ محمود قریشی نے کہا کہ ایک ڈاکٹر کو بلایا گیا جس کے پاس محض بلڈ پریشر دیکھنے کی مشین تھی۔
