اسلام آباد: وزیر خارجہ شاہ محمود قریشی کا کہنا ہے کہ نئے بلدیاتی نظام سے بلدیاتی اداروں کوبراہ راست فنڈز دیے جائیں گے۔
تفصیلات کے مطابق اسلام آباد میں میڈیا سے گفتگو کرتے ہوئے وزیرخارجہ شاہ محمود قریشی نے کہا کہ پارلیمانی اجلاس کا ایجنڈا 2 نکاتی تھا، اجلاس میں رمضان بازاروں سے متعلق پنجاب حکومت کے اقدامات سے آگاہ کیا گیا۔
شاہ محمود قریشی نے کہا کہ پنجاب بھرمیں 309 رمضان بازارقائم کیے جا رہے ہیں، رمضان بازاروں میں مختلف اشیا پر13 ارب سے زائد کی سبسڈی دی جائے گی۔
وزیرخارجہ نے کہا کہ پنجاب میں نئے بلدیاتی نظام سے اختیارات نچلی سطح پرمنتقل ہوں گے، نئے بلدیاتی نظام سے بلدیاتی اداروں کوبراہ راست فنڈزدیے جائیں گے۔
شاہ محمود قریشی نے مزید کہا کہ نئے نظام سے فنڈزکی تقسیم میں شفافیت آئے گی۔
یاد رہے کہ 30 اپریل کو پنجاب اسمبلی میں نئے بلدیاتی نظام کا قانون منظورکرلیا گیا تھا۔ اپوزیشن نے بل کی منظوری کے خلاف ایوان میں احتجاج کیا تھا۔ نئے بلدیاتی نظام کے تحت ویلج کونسل اور شہروں میں محلہ کونسل کا انتخاب غیرجماعتی بنیادوں پر ہوگا۔
گورنر پنجاب چوہدری سرور نے تین روز قبل لوکل گورنمنٹ بل 2019 پر دستخط کیے جس کے بعد نیا بلدیاتی نظام صوبے میں نافذ ہوگیا۔ نئے بلدیاتی نظام کے تحت پنجاب کے بلدیاتی ادارے ایڈمنسٹریٹرز چلائیں گے جن کی معیاد ایک سال تک ہوگی۔ لوکل گورنمنٹ بل منظور ہوتے ہی مسلم لیگ ن کے ہاتھ سے لوکل گورنمنٹ بھی نکل گئی۔
نئے بلدیاتی الیکشن آئندہ سال ہوں گے جب تک شہروں میں میونسپل اور محلہ کونسل جبکہ دیہات میں تحصیل اور ویلج کونسل ایڈمنسٹریٹرز کے تحت کام کریں گی۔
