اسلام آباد: وزیر خارجہ شاہ محمود قریشی کا کہنا ہے کہ جنوبی پنجاب سیکریٹریٹ میں ایڈیشنل چیف سیکریٹری ہفتے میں 3 دن موجود رہیں گے، جنوبی پنجاب کے عوام کے مسائل ان کی دہلیز پر حل کیے جائیں گے۔
تفصیلات کے مطابق وزیر خارجہ شاہ محمود قریشی نے سماجی رابطے کی ویب سائٹ ٹویٹر پر اپنے ٹویٹ میں کہا کہ جنوبی پنجاب کے انتظامی معاملات میں ملتان نظر انداز نہیں کیا جائے گا، جنوبی پنجاب سیکرٹریٹ ملتان میں بھی مکمل فعال ہوگا۔
ملتان کو جنوبی پنجاب کے انتظامی امور میں نظر انداز نہیں کیا جائے گا-جنوبی پنجاب سیکریٹیریٹ ملتان، مکمّل فعال ہو گا- جہاں ایڈیشنل چیف سیکرٹری ہفتے میں 3 روز موجود رہیں گے- پی ٹی آئی منشور میں کیے گئے وعدے کے مطابق جنوبی پنجاب کے لوگوں کو انصاف ان کی دہلیز پر مہیا ہو گا انشاء اللہ۔
— Shah Mahmood Qureshi (@SMQureshiPTI) July 5, 2020
وزیر خارجہ کا کہنا تھا کہ جنوبی پنجاب سیکریٹریٹ میں ایڈیشنل چیف سیکریٹری ہفتے میں 3 دن موجود رہیں گے، تحریک انصاف نے جنوبی پنجاب سے متعلق وعدے اور منشور پر عمل کر کے دکھا دیا۔
انہوں نے مزید کہا کہ جنوبی پنجاب کے عوام کے مسائل ان کی دہلیز پر حل کیے جائیں گے۔
اس سے قبل ایک موقع پر وزیر خارجہ نے کہا تھا کہ جنوبی پنجاب کے ایڈیشنل چیف سیکریٹری اور آئی جی کی تعیناتی ہو چکی، جنوبی پنجاب والوں کو اب اپنے کاموں کے لیے لاہور نہیں جانا پڑے گا، پولیس اور انتظامی معاملات اب ملتان اور بہاولپور میں ہی حل ہوں گے۔
انہوں نے کہا تھا کہ اب ماضی کی طرح جنوبی پنجاب کے فنڈز دوسری مد میں خرچ نہیں ہوں گے، اب جنوبی پنجاب کا پیسہ صرف جنوبی پنجاب پر خرچ ہوگا اور جنوبی پنجاب والوں کو ان کے گھروں کے قریب انصاف میسر آئے گا۔
