اسلام آباد : جنوبی پنجاب صوبے کے قیام کیلئے آئینی ترمیمی بل اسپیکر قومی اسمبلی کو پیش کردیا گیا ، شاہ محمود قریشی نے کہا اٹھائیس مارچ کو ایجنڈے پر جنوبی پنجاب کا آئینی ترمیمی بل لایا جارہا ہے۔
تفصیلات کے مطابق وزیر خارجہ شاہ محمود قریشی نے میڈیا سے گفتگو کرتے ہوئے کہا وزیراعظم نے جنوبی پنجاب کے عوام سے کیا وعدہ پوراکردیا، جنوبی پنجاب کے قیام کیلئے آئینی ترمیمی بل اسپیکر کوپیش کردیا، جنوبی پنجاب کا قیام پی ٹی آئی کے منشور کا حصہ ہے۔
شاہ محمود قریشی کا کہنا تھا کہ یہ آئینی ترمیمی بل جمع کرادیا ، میری وزیرپارلیمانی امور بابراعوان سے بھی بات ہوگئی ہے، انشا اللہ 28 مارچ کو ایجنڈے پر جنوبی پنجاب کا آئینی ترمیمی بل لایا جارہا ہے، جنوبی پنجاب کے لوگوں کیلئے خوش آئند پیش رفت ہے۔
وزیر خارجہ نے کہا کہ پیپلزپارٹی دعویٰ کرتی ہے کہ ہم جنوبی پنجاب صوبے کے حق میں ہیں، ن لیگ والے بھی کہتے تھے کہ جنوبی پنجاب صوبہ بننا چاہئے، اگر تمہیں صوبہ چاہئیں تو آؤ ہمارے بل کو ووٹ دو، اگر تم مخلص ہو جنوبی پنجاب کو عملی شکل دینا چاہتے ہو تو آؤ ووٹ دو۔
ان کا کہنا تھا کہ جنوبی پنجاب کےعوام ایم این ایزکے دروازے پر دستک دیں، جنوبی پنجاب کےعوام درخواست کریں اس بل پرووٹ دیں۔
شاہ محمود قریشی نے مزید کہا کہ ہم نے پی پی کی طرح آنسوں نہیں بہائے عمل کیا، ہم نے عملی اقدامات کئے،رولز آف بزنس بنائے، ہم نے جنوبی پنجاب کیلئے ہر محکمے کا الگ سیکریٹری تعینات کیا۔
وزیر خارجہ کا کہنا تھا کہ رولز آف بزنس میں بے پناہ مخالفت کی گئی، کچھ بیوروکریٹس نے رکاوٹیں ڈالی جن کا نام نہیں لینا چاہتا، ہاشم جواں بخت نے جنوبی پنجاب کے قیام کیلئے عملی کردار ادا کیا جبکہ عثمان بزدار ،خسروبختیار جنوبی پنجاب کیلئے پی ٹی آئی میں ضم ہوئے۔
انھوں نے کہا کہ تاریخ میں پہلی بار جنوبی پنجاب کے ترقیاتی فنڈز کا پیسہ وہی خرچ ہورہا ہے، ایڈمنسٹریٹو اقدامات ہوگئے پھر بجٹ میں رقم رکھوائی گئی، گزشتہ سالانہ بجٹ جو پاس ہوا ، اس میں جنوبی پنجاب کے سالانہ ترقیاتی پروگرام کا علیحدہ منصوبہ بنایا گیا۔
شاہ محمود قریشی کا مزید کہنا تھا کہ اب آزمائش ہے، گیلانی تمہارے مگر مچھ کے آنسونکل آئیں گے، گیلانی کا ڈرامہ اب ختم ہوجائے گا، مخلص ہو تو آؤ جنوبی پنجاب کو ووٹ دو۔
