اسلام آباد: وزیر خارجہ شاہ محمود قریشی نے مقبوضہ کشمیر کی موجودہ تشویش ناک صورت حال پر اسلامی ممالک کی تنظیم او آئی سی سے رابطہ کیا ہے۔
تفصیلات کے مطابق وزیر خارجہ شاہ محمود قریشی نے اسلامی ممالک کی تنظیم (او آئی سی) کے سیکریٹری جنرل سے ٹیلی فونک رابطہ کیا اور مقبوضہ جموں و کشمیر کی تشویش ناک صورت حال پر تبادلہ خیال کیا۔
شاہ محمود قریشی نے کہا کہ مقبوضہ کشمیر کے نہتے مسلمانوں پر ظلم و ستم کے پہاڑ توڑے جا رہے ہیں، مقبوضہ کشمیر کے مسلمان او آئی سی پر نظریں جمائے بیٹھے ہیں۔
انھوں نے کہا کہ کشمیری مسلمانوں کو عید اور جمعے کی نمازیں بھی ادا کرنے نہیں دی گئیں، مقبوضہ وادی میں حقایق مخفی رکھنے کے لیے ذرایع مواصلات پر پابندی ہے۔
تازہ ترین خبریں پڑھیں: بھارت کے خلاف حکومت اور فوج تیار ہے، شاہ محمود قریشی
دریں اثنا، او آئی سی کے سیکریٹری جنرل نے مقبوضہ وادی کی صورت حال پر اظہار تشویش کیا اور کہا کہ ساری صورت حال پر وہ گہری نظر رکھے ہوئے ہیں۔
دونوں رہنماؤں نے اس سلسلے میں مشاورت جاری رکھنے کا بھی فیصلہ کیا۔
دوسری طرف آج وزیر خارجہ نے اسلام آباد میں ایک تقریب سے خطاب کے دوران پڑوسی ملک بھارت کو واضح تنبیہہ کی کہ اس کے خلاف حکومت، فوج اور عوام تیار ہیں۔
انھوں نے مقبوضہ کشمیر میں لاگو بھارتی قوانین کو ڈریکولائی قوانین قرار دیا، کہا کہ ہر کشمیری کے دروازے پر ایک بھارتی فوجی کھڑا ہے، جب کہ دنیا بھارت کو خطے میں امن کو داؤ پر لگاتے ہوئے دیکھ رہی ہے۔
