اسلام آباد : وزیر خارجہ شاہ محمود قریشی نے کہا ہے کہ پاکستان اور سعودی عرب کے تعلقات کا دیگر ممالک سے موازنہ کیا ہی نہیں جاسکتا، او آئی سی اجلاس بلانے کیلئے سعودی عرب اور یواےای کی حمایت اہم ہے۔
یہ بات انہوں نے اسلام آباد میں صحافیوں سے گفتگو کرتے ہوئے کہی، انہوں نے کہا کہ سعودی عرب اور یواےای کے وزرائے خارجہ نے وزیراعظم عمران خان سے ملاقات کی ہے۔
ملاقات میں مقبوضہ کشمیر میں بھارتی غیرقانونی اور یکطرفہ فیصلے پربات چیت ہوئی، وزیراعظم نے کشمیری عوام کے بنیادی حقوق کا احترام کرنے پرزوردیا۔
وزیر خارجہ نے کہا کہ سعودی عرب اور پاکستان کے تعلقات الگ ہی نوعیت کے ہیں، پاکستان،سعودی عرب تعلقات کا دیگرممالک سے موازنہ کیاہی نہیں جاسکتا۔
پاکستان اور سعودی عرب کے اسٹریٹجک تعلقات ہیں، او آئی سی اجلاس بلانے کیلئے سعودی عرب،یواےای کی حمایت اہم ہے۔
شاہ محمودقریشی کا مزید کہنا تھا کہ جنرل اسمبلی سائیڈ لائن میں او آئی سی کشمیر کانٹکٹ گروپ کا اجلاس ہوگا، پاکستان او آئی سی کے کردار کو نمایاں دیکھنا چاہتا ہے۔
بھارت کے 5اگست کےا قدامات غیر قانونی ہیں، او آئی سی کے اجلاس میں یو اے ای اور سعودی عرب کا اہم کردار ہوگا، سعودی عرب، یو اےای مندوبین جنیوا میں پاکستان کی حمایت کریں گے۔
