استنبول : وزیر خارجہ مخدوم شاہ محمود قریشی نے ہارٹ آف ایشیا کانفرنس کے دوران بھارتی وزیر کی تقریر کا بائیکاٹ کر دیا، انہوں نے ترک صدر رجب طیب اردوان سمیت دیگر اہم شخصیات سے ملاقاتیں بھی کیں۔
تفصیلات کے مطابق ترکی کے شہر استنبول میں جاری ہارٹ آف ایشیا کانفرنس کے موقع پر وزیرخارجہ شاہ محمود قریشی نے احتجاجاً بھارتی وزیر کے خطاب کا بائیکاٹ کردیا۔
وہ خطاب شروع ہونے سے قبل ہی ہال سے باہر روانہ ہوگئے۔ ذرائع کے مطابق وزیر خارجہ نے مقبوضہ جموں و کشمیر میں جاری بھارتی مظالم کے پیش نظربھارتی وزیر کے خطاب کا بائیکاٹ کیا۔
بعد ازاں وزیرخارجہ شاہ محمود قریشی نے ہارٹ آف ایشیا کانفرنس میں مختلف شخصیات سے ملاقاتیں کیں انہوں نے ترک صدر رجب طیب اردوان، ترک وزیر خارجہ چاوش أوغلو اور افغانستان کے قائم مقام وزیرخارجہ ادریس زمان سے ملاقات میں اہم امور پر تبادلہ خیال کیا۔
شاہ محمود قریشی نے ترک صدر کو پاکستان کی قیادت کی جانب سے نیک خواہشات کا پیغام بھی پہنچایا۔ اس کے علاوہ وزیر خارجہ کی استنبول میں جاری ہارٹ آف ایشیا کانفرنس کے دوران امریکہ کی قائم مقام معاون وزیر خارجہ ایلس ویلز سے بھی ملاقات ہوئی جس میں دوطرفہ تعلقات اور عالمی امور پر گفتگو کی گئی۔
