لاہور: رہنما پاکستان تحریک انصاف (پی ٹی آئی) شاہ محمود قریشی کو دل میں تکلیف کے باعث کوٹ لکھپت جیل سے پنجاب اسٹی ٹیوٹ آف کارڈیولوجی (پی آئی سی) منتقل کر دیا گیا۔
شاہ محمود قریشی کے وکیل رانا مدثر ایڈووکیٹ نے بتایا کہ سابق وزیر خارجہ کو چیک اپ کیلیے پی آئی سی لایا گیا ہے جہاں ان کے مختلف ٹیسٹ جا رہے ہیں۔
رانا مدثر ایڈووکیٹ نے بتایا کہ فجر کی نماز کے بعد سابق وزیر خارجہ کو اچانک دل میں تکلیف ہوئی، ان کا جیل ڈاکٹرز نے چیک اپ کیا، جیل انتظامیہ کی جانب سے ان کے اہل خانہ کو بھی اطلاع دی گئی۔
یہ بھی پڑھیں: آج جو ہمیں ہتھکڑیاں لگا رہے ہیں کل یہ ہمیں سیلوٹ کریں گے، شاہ محمود قریشی
شاہ محمود قریشی اس وقت 9 مئی کے مقدمات میں کوٹ لکھپت جیل میں سزا کاٹ رہے ہیں، اس سے قبل وہ راولپنڈی کی اڈیالہ جیل میں بھی قید رہے ہیں۔
دسمبر 2024 میں 9 مئی جی ایچ کیو حملہ کیس میں شاہ محمود قریشی، علی امین گنڈا پور سمیت 14 ملزمان پر فرد جرم عائد کی گئی تھی۔
عدالت نے جن ملزمان پر فرد جرم عائد کی ان میں لطاسب ستی، عمر تنویر بٹ، شبلی فراز، کنوزل شوزب، تیمور مسعود، سعد علی خان، سکندر زیب، زوہیب آفریدی، فہد مسعود، راجا ناصر محفوظ بھی شامل ہیں۔
انسداد دہشتگردی عدالت میں ملزمان نے صحت جرم سے انکار کیا تھا۔ جج امجد علی شاہ نے کیس کی سماعت کی تھی جبکہ مزید 6 ملزمان پر فرد جرم لگانا باقی تھی۔
شاہ محمود قریشی کی پی ٹی آئی قیادت سے اپیل
اپریل میں سابق وزیر خارجہ نے جیل سے باہر موجود پی ٹی آئی کی پارٹی قیادت سے اپیل کی تھی کہ ہماری جماعت کی جو قیادت جیل سے باہر ہے وہ باہمی اتفاق اور حسن سلوک برقرار رکھیں۔
انہوں نے قیادت کو مخاطب کرتے ہوئے کہا تھا کہ جو جیل میں پڑے ہیں وہ آپ کی طرف دیکھ رہیں ہیں، آپ سے استدعا ہے جیل والوں کیلیے اقدامات کریں، قیادت جو ایک دوسرے کیخلاف بیان بازی کر رہی ہے اس سے جو جیلوں میں ہیں ان کے دل جلتے ہیں۔
انہوں نے اس بات کو بھی دہرایا تھا کہ میرے خلاف جو مقدمات بنے ہیں ان میں ایک ہی الزام ہےجبکہ میں کسی سازش، توڑ پھوڑ یا شر انگیزی کے واقعہ میں موجود نہیں تھا۔
