لاہور: وزیر خارجہ شاہ محمود قریشی اور وزیر اعلیٰ پنجاب عثمان بزدار کے درمیان ملاقات ہوئی جس میں مقبوضہ کشمیر میں بھارت کی ریاستی دہشت گردی کی مذمت کی گئی۔
تفصیلات کے مطابق وزیر خارجہ شاہ محمود قریشی اور وزیر اعلیٰ پنجاب عثمان بزدار کے درمیان ملاقات ہوئی۔ اس موقع پر وفاقی پارلیمانی سیکرٹری مخدوم زین قریشی بھی موجود تھے۔
ملاقات میں مقبوضہ کشمیر میں بھارت کی ریاستی دہشت گردی اور لائن آف کنٹرول پر بھارتی فوج کی بلا اشتعال فائرنگ کے واقعات کی مذمت کی گئی۔
وزیر اعلیٰ پنجاب عثمان بزدار کا کہنا تھا کہ تحریک انصاف حکومت نے ہر سطح پر بھارتی ظلم کو بے نقاب کیا ہے، وزیر اعظم عمران خان کی قیادت میں خود مختار پاکستان ہماری منزل ہے۔
انہوں نے کہا کہ بہاولپور کے بعد کابینہ اجلاس دیگر ڈویژن میں بھی ہوں گے، جنوبی پنجاب کے لیے الگ سیکریٹریٹ کا قیام جلد عمل میں آئے گا۔ جنوبی پنجاب کے لیے ترقیاتی پروگرام بھی الگ ہوگا۔
عثمان بزدار نے کہا کہ جنوبی پنجاب کے عوام سے کیے گئے وعدے پورے کریں گے، ملتان میں کینسر اسپتال کے قیام کا منصوبہ بھی زیر غور ہے۔
وزیر خارجہ شاہ محمود قریشی نے کہا کہ پاکستان نے مسئلہ کشمیر کو ہر فورم پر بھرپور انداز میں اجاگر کیا، حکومت تمام ممالک سے برادرانہ تعلقات کی پالیسی پر یقین رکھتی ہے۔
انہوں نے کہا کہ ملکی سالمیت اور خود مختاری پر کوئی سمجھوتہ نہیں کریں گے۔
