اسلام آباد : پاکستان تحریک انصاف کے رہنما شاہ محمود قریشی کا کہنا ہے کہ بائیڈن اور نریندرمودی کےمشترکہ بیان سے ہر پاکستانی کا دل دُکھا ہے۔
تفصیلات کے مطابق پاکستان تحریک انصاف کے رہنما شاہ محمودقریشی نے عدالت میں پیشی کے موقع پر میڈیا سے گفتگو میں بائیڈن اور مودی کے مشترکہ بیان کے حوالے سے کہا کہ دہشت گردی کیخلاف پاکستان کی کاوشوں کو تسلیم نہیں کیا گیا، بائیڈن اور مودی کے مشترکہ بیان سے ہر پاکستانی کا دل دُکھا ہے۔
سابق وزیرخارجہ شاہ محمود قریشی کا کہنا تھا کہ مشترکہ بیان میں مقبوضہ کشمیر اور بھارت میں اقلیتوں کے ساتھ سلوک کا کوئی ذکر نہیں، نجانے کیوں انسانی حقوق کی علمبردار تنظیمیں خاموش ہیں۔
اس سے قبل انسداد دہشت گردی کی عدالت میں تھانہ کھنہ کے دہشت گردی مقدمے میں درخواست ضمانت پر سماعت ہوئی تھی، انسداددہشت گردی عدالت کے نئے جج نےابھی چارج نہیں لیا، جس کے باعث شاہ محمود قریشی کی ضمانت میں بغیر کارروائی 10 جولائی تک توسیع کردی گئی تھی۔
