اسلام آباد : تحریک انصاف کے وائس چیئرمین شاہ محمود قریشی کا کہنا ہے کہ یہ لوگ اس قابل نہیں ان سے مذاکرات کیے جائیں، انکا کوئی دین وایمان نہیں ہے۔
تفصیلات کے مطابق تحریک انصاف کے وائس چیئرمین شاہ محمود قریشی نے میڈیا سے گفتگو کرتے ہوئے کہا کہ مجھے بطوروائس چیئرمین پی ٹی آئی اوروکلاکوعمران خان تک رسائی دی جائے، عمران خان کی زخمی ٹانگ پر چوٹیں آئی ہیں۔
شاہ محمودقریشی کا کہنا تھا کہ ملک کو سیاستدانوں نے آئینی بحران میں دھکیلا ہے، پارلیمنٹ کوعدلیہ سے لڑانے کی کوشش کی جارہی ہے۔
رہنما پی ٹی آئی نے کہا کہ اس وقت ملک معاشی بحران کا شکار ہے اور آئی ایم ایف کے ساتھ ان کا پروگرام طے نہیں ہوا۔
انھوں نے بتایا کہ عمران خان کی گرفتاری کیخلاف ملک بھر میں احتجاج ہورہاہے، پرامن احتجاج آپ کا آئینی اورقانون حق ہے لیکن یہ دباؤ میں لانے کیلئے بہانے تلاش کررہے ہیں۔
شاہ محمودقریشی نے مزید کہا کہ پورے ملک میں اضطراب کی کیفیت ہے، ملتان میں میرے گھر پر چھاپہ مارا گیا، چھاپے کے دوران ملازمین پرتشدد کیاگیا اور 9افراد کو گرفتار کیاگیا۔
ان کا کہنا تھا کہ 2 بجے6رکنی کمیٹی کی میٹنگ ہے ، میں سربراہی کروں گا، یہ اس قابل نہیں ان سے مذاکرات کیے جائیں، ان لوگوں کا کوئی دین وایمان نہیں ہے، کوشش کروں گا عمران خان سے ملاقات ہوجائے۔
