اسلام آباد: وزیرخارجہ شاہ محمود قریشی کا کہنا ہے کہ بھارت میں ایک بہت بڑا طبقہ مودی پالیسوں سے متفق نہیں، بھارت آج کشمیر کے مسئلے پرتقسیم دکھائی دے رہا ہے۔
تفصیلات کے مطابق اے آروائی نیوز سے خصوصی گفتگو کرتے ہوئے وزیرخارجہ شاہ محمود قریشی نے کہا کہ مقبوضہ کشمیرمیں لوگوں کے ساتھ ظلم ہورہا ہے۔
وزیرخارجہ نے کہا کہ امریکا، یورپ کے جمہوری سوچ رکھنے والے کشمیرمیں ظلم کے خلاف بول پڑے جبکہ بھارت میں ایک بہت بڑا طبقہ مودی پالیسوں سے متفق نہیں ہے۔
شاہ محمود قریشی نے مزید کہا کہ بھارت آج کشمیر کے مسئلے پرتقسیم دکھائی دے رہا ہے۔
مقبوضہ کشمیرمیں 27ویں روز بھی کرفیو
مقبوضہ کشمیر میں آج مسلسل 27ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔
کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔
یاد رہے کہ پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کردیا تھا۔
راجیہ سبھا میں بل کے حق میں 125 جبکہ مخالفت میں 61 ووٹ آئے تھے، بھارت نے 6 اگست کو لوک سبھا سے بھی دونوں بل بھاری اکثریت کے ساتھ منظور کرالیے تھے۔
