راولپنڈی: پاکستان تحریک انصاف کے رہنما شاہ محمود کو اڈیالہ جیل سے لاہور منتقل کردیا گیا، ان پر لاہورمیں 9 مئی کے متعدد مقدمات درج ہیں
تفصیلات کے مطابق پاکستان تحریک انصاف (پی ٹی آئی) کے وائس چیئرمین اور سابق وزیر خارجہ شاہ محمود قریشی کو اڈیالہ جیل راولپنڈی سے لاہور منتقل کر دیا گیا ہے۔
ذرائع نے بتایا کہ گرفتار پی ٹی آئی رہنما کو انسداد دہشت گردی کی عدالت لاہور میں پیش کیا جائے گا، ان پر 9 مئی کو لاہور میں ہونے والے فسادات کے متعدد مقدمات درج ہیں۔
ذرائع کا کہنا ہے کہ لاہورپولیس جیل میں 9مئی مقدمات میں شاہ محمود سےتفتیش کر چکی ہے۔
اس سے قبل پی ٹی آئی رہنما کو 9 مئی کے فسادات میں مبینہ طور پر ملوث ہونے کے بعد جوڈیشل ریمانڈ پر بھیج دیا گیا تھا۔
عدالت نے جسمانی ریمانڈ میں توسیع کی استدعا مسترد کرتے ہوئے پی ٹی آئی رہنما کو 14 روزہ جوڈیشل ریمانڈ پر پولیس کے حوالے کیا تھا۔
واضح رہے کہ اسلام آباد ہائی کورٹ نے سابق وزیراعظم عمران خان اور پی ٹی آئی رہنما شاہ محمود کو سائفر کیس میں بری کر دیا تھا۔
اسلام آباد ہائی کورٹ کے چیف جسٹس عامر فاروق اور جسٹس میاں گل حسن اورنگزیب نے سائفر کیس میں سزا کو چیلنج کرنے والی درخواستوں پر فیصلہ سنایا تھا۔
رواں سال جنوری میں پی ٹی آئی کے بانی اور پارٹی کے وائس چیئرمین کو سائفر کیس میں دس دس سال قید کی سزا سنائی گئی تھی جبکہ رہنما پی ٹی آئی کو حالیہ 9 مئی کے مقدمات میں گرفتار کیا گیا ہے۔
