کوالالمپور: وزیرخارجہ شاہ محمود قریشی 2 روزہ سرکاری دورے پر ملیشیا پہنچ گئے، جہاں وہ وزیراعظم مہاتیر محمد سمیت دیگر اعلیٰ حکام سے ملاقاتیں کریں گے۔
تفصیلات کے مطابق وزیرخارجہ شاہ محمود قریشی کے ایئرپورٹ پہنچنے پر ملیشیا کی وزارت خارجہ کے ڈی جی نے شاندار استقبال کیا، اس موقع پر پاکستانی ہائی کمشنر اور سینئرحکام بھی موجود تھے۔
وزیرخارجہ ملیشیئن ہم منصب داتو سیف الدین کی دعوت پر دورہ کررہے ہیں، شاہ محمود وزیراعظم مہاتیر سمیت اعلیٰ قیادت سے ملاقاتیں کریں گے، ان کی ملیشیا کی بزنس کمیونٹی سے بھی ملاقات ہوگی۔
پاکستان میں بیرونی سرمایہ کاروں کے لیے مراعات سے آگاہ کیا جائے گا، کاروبار کے لیے میسر بہترین مواقعوں سے بھی آگاہی فراہم کی جائے گی، وزیرخارجہ پاکستانی سفارتخانے میں”کمیونٹی سروس سینٹر” کا افتتاح بھی کریں گے۔
وزیرخارجہ کو کوالالمپور سمٹ میں شرکت کی دعوت ملائیشین ہم منصب نے دی تھی، وزیرخارجہ ملائیشیا میں وزیر خارجہ تاجر برادری سے بھی ملاقات کریں گے، ان کا کہنا ہے کہ وہاں کے تاجروں کو پاکستان میں سرمایہ کاری کے میسر مواقعوں سے آگاہ کیا جائے گا۔
شاہ محمود کا ملیشیا کے ہم منصب سے رابطہ، کشمیر سمیت دوطرفہ تعلقات پر گفتگو
یاد رہے کہ 31 اکتوبر کو وزیرخارجہ شاہ محمودقریشی اور ملیشیا کے ہم منصب سیف الدین عبداللہ کے درمیان ٹیلی فونک رابطہ ہوا، جس میں کشمیر سمیت باہمی دلچسپی کے امور پر تبادلہ خیال کیا گیا تھا۔
پاکستان اور ملیشیا کے وزرائے خارجہ کے درمیان ہونے والی ٹیلی فونک گفتگو میں دو طرفہ تعلقات، خطے میں امن کی صورت حال اور باہمی دلچسپی کے امور پر بات چیت ہوئی تھی۔
