بھارتی کرکٹ ٹیم کے کوچ کی تلاش اس وقت زور و شور سے جاری ہے جبکہ اکثر نامور غیرملکی کرکٹر بلیوشرٹس کی کوچنگ سے انکار کرچکے ہیں۔
میڈیا رپوٹس کے مطابق اگر گوتم گمبھیر اور بی سی سی آئی بھارت کے ہیڈ کوچ کے کردار کے لیے معاملات کو آگے بڑھانے کا فیصلہ کرتے ہیں تو اس میں شاہ رخ خان کا کردار اہم ہو سکتا ہے۔
گوتم چونکہ اس وقت کولکتہ کے کوچ ہیں جبکہ کنگ خان فرنچائز کے شریک مالک ہونے کے ساتھ کھلاڑیوں اور کوچ پر اپن اثر و رسوخ رکھتے ہیں۔
ذرائع نے بتایا کہ اگر بھارتی کرکٹ ٹیم کے ہیڈ کوچ کی پوزیشن کی بات آتی ہے تو اس کا فیصلہ شاہ رخ خان اور گمبھیر کے درمیان نجی بات چیت میں کیا جائے گا۔
اس سے قبل جے شاہ اشارہ دے چکے ہیں کہ امریکا میں ٹی ٹوئنٹی ورلڈ کپ کے بعد بھارت کے ہیڈ کوچ کے طور پر راہول ڈریوڈ کی جگہ ممکنہ طور پر کسی بھارتی کوچ کو منتخب کیا جائے گا۔
بھارتی بورڈ کے سربراہ کا کہنا تھا کہ یہ بہت اہم ہے کہ ہمارے کوچ کو ہمارے ڈومیسٹک کرکٹ فریم ورک کا بخوبی علم ہو تاکہ وہ بھارتی ٹیم کو حقیقی معنوں میں اونچائیوں تک لے جایا جا سکے۔
واضح رہے کہ بورڈ آف کنٹرول فار کرکٹ ان انڈیا نے سابق اوپنر گوتم گمبھیر سے رابطہ کیا ہے کیونکہ وہ سبکدوش ہونے والے ہیڈ کوچ راہول ڈریوڈ کا متبادل تلاش کرنے کے لیے سرگرداں ہیں۔
بھارتی بورڈ نے مبینہ طور پر ہیڈ کوچ کے عہدے کے لیے اسٹیفن فلیمنگ سے بھی رابطہ کیا تھا لیکن چونکہ یہ میعاد 2027 ورلڈ کپ تک ہوگی اس لیے نیوزی لینڈ کے سابق کپتان اس کے تیار نظر نہ آئے۔
