’ڈنکی‘ کے ہدایت کار راجکمار ہیرانی نے انکشاف کیا ہے کہ شاہ رخ اچھی طرح جانتے تھے کہ مذکورہ فلم باکس آفس پر ’جوان‘ کی طرح کمائی نہیں کرپائے گی۔
معروف ہدایت کار راجکمار ہیرانی اور شاہ رخ خان نے پہلی بار فلم ’ڈنکی‘ کے لیے اشتراک کیا تھا جو کہ کچھ دنوں پہلے سینما گھروں کی زینت بنی تھی۔ فلم کو شائقین کی جانب سے ویسا زبردست رسپانس نہیں مل سکا جیسا کہ کنگ خان کی سابق فلموں پٹھان اور جوان کو ملا تھا۔
بھارتی ذرائع ابلاغ کو دیے جانے والے تازہ انٹرویو میں راجکمار نے بتایا کہ سپر اسٹار شاہ رخ خان ایک ذہین آدمی ہیں انھیں اندازہ تھا کہ فلم ڈنکی زیادہ بزنس نہیں کرے گی۔
تاہم اپنے ایک تازہ انٹرویو کے دوران راجکمار ہیرانی کا کہنا تھا کہ یکے بعد دیگرے دو ایکشن فلمیں کرنے کے بعد شاہ رخ ڈنکی کی جانب متوجہ تھے۔
انکا کہنا تھا کہ وہ اس طرح کی فلم کرنے میں خوش تھے، لیکن شاہ رخ ایک ذہین آدمی ہیں وہ جانتے تھے کہ لوگ ایکشن فلمیں زیادہ پسند کر رہے ہیں کیونکہ آجکل اسی کا ٹرینڈ ہے۔
انھوں نے کہا کہ مجھے خوشی ہے کہ ڈنکی اس سال واحد نان ایکشن فلم ہے جس کی کمائی 400 کروڑ روپے تک پہنچنے کی توقع ہے۔
فلمساز نے بتایا کہ شاہ رخ نے ان سے کہا تھا کہ ڈنکی باکس آفس پر اس طرح کمائی نہیں کرے گی جس طرح ان کی پچھلی فلموں نے کیا تھا اور وہ اس بارے میں کافی حقیقت پسند تھے۔
راج نے بتایا کہ شاہ رخ مجھے کہتے رہے کہ جس طرح جوان باکس آفس پر چھائی ہوئی تھی شروع میں ڈنکی سے ایسی امیدن نہ لگائیں۔ میں یہ فلمیں پہلے بھی کرچکا ہوں اس لیے ہمیں حقیقت پسند ہونا چاہیے۔
واضح رہے کہ شاہ رخ خان نے 2023 میں چار سال بعد فلموں میں واپسی کی تھی اور ان کی فلم پٹھان اور جوان نے زبردست کامیابی سمیٹتے ہوئے عالمی باکس آفس پر مجموعی طور پر دو ہزار کروڑ بھارتی روپے سے زائد کا بزنس کیا تھا۔
