اسلام آباد: شاہ سلمان کی علالت کے سلسلے میں پاکستان کے آرمی چیف جنرل قمر جاوید باجوہ نے سعودی ولی عہد کو فون کیا ہے۔
سعودی پریس ایجنسی کے مطابق آرمی چیف جنرل قمر جاوید باجوہ نے ولی عہد محمد بن سلمان کو فون کر کے شاہ سلمان بن عبدالعزیز کی خیریت دریافت کی۔
پاکستان کے آرمی چیف نے فون پر سعودی فرماں روا کی صحت یابی کے لیے دعاؤں بھرا خصوصی پیغام دیا، شہزادہ محمد بن سلمان نے جنرل قمر جاوید باجوہ کے دلی جذبات پر شکریہ ادا کیا۔
چند دن قبل وزیر اعظم عمران خان نے سعودی فرماں روا شاہ سلمان بن عبدالعزیز کی طبیعت کی ناسازی پر تشویش کا اظہار کرتے ہوئے ان کی جلد صحت یابی کے لیے دعا کی تھی۔
وزیراعظم کا سعودی فرمانروا کی طبیعت ناسازی پر تشویش کا اظہار، جلد صحتیابی کیلئے دعا
یاد رہے سعودی عرب کے بادشاہ شاہ سلمان کو 20 جولائی کو طبیعت کی ناسازی کے باعث ریاض کے کنگ فیصل اسپیشلسٹ اسپتال منتقل کیا گیا تھا، 84 سالہ شاہ سلمان کو پتے کی تکلیف تھی جس پر دو روز قبل ان کی سرجری کی گئی، اور پتا کامیابی سے نکال لیا گیا۔
ڈاکٹرز کے مطابق شاہ سلمان چند دن اور اسپتال میں داخل رہیں گے، شاہ سلمان بن عبدالعزیز 2015 سے سعودی عرب کے بادشاہ ہیں، بادشاہت ملنے سے قبل تقریباً ڈھائی سال وہ سعودی عرب کے ولی عہد بھی رہے جب کہ انھوں نے 50 سال ریاض کے گورنر کے فرائض بھی سرانجام دیے۔
