اسلام آباد: وزیر اعظم شہباز شریف نے نجم سیٹھی کو چیئرمین پاکستان کرکٹ بورڈ (پی سی بی) کے لیے امیدوار نامزد کر دیا۔
وزیر اعظم شہباز شریف نے چیئرمین مینجمنٹ کمیٹی پی سی بی نجم سیٹھی سے ملاقات کی جہاں وزیراعظم شہبازشریف نے ان پر مکمل اعتماد کا اظہار کردیا۔
ذرائع نے بتایا کہ وزیر اعظم نے نجم سیٹھی کو چیئرمین پی سی بی کے لیے امیدوار نامزد کردیا، انہوں نے کہا کہ جلد 2 نام پی سی بی گورنرز بورڈ میں بھجوائیں گے۔
ذرائع نے بتایا کہ وزیر اعظم شہباز شریف نے نجم سیٹھی کو جلد پی سی بی چیئرمین کے الیکشنز مکمل کرنے کی ہدایت کی ہے۔
ذرائع کا بتانا ہے کہ ملاقات میں نجم سیٹھی نے وزیر اعظم شہباز شریف کو ایشیاکپ، انڈیا میں ورلڈ کپ سے متعلق بریفنگ دی ساتھ ہی انہوں نے وزیر اعظم سے ایشیا کپ اور ورلڈ کپ سے متعلق رائے بھی مانگ لی۔
ذرائع کا کہنا ہے کہ نجم سیٹھی نے وزیر اعظم کو پی سی بی کے 2014 کے آئین بحالی سے متعلق بریفنگ دی۔
نجم سیٹھی نے وزیر اعظم کو بریفنگ میں بتایا کہ پی سی بی کا 2014 کا آئین مکمل بحال ہوچکا ہے، 90 فیصد سے زیادہ اضلاع میں پی سی بی ڈسٹرکٹس کا الیکشن مکمل ہوچکا ہے۔
برینفگ میں بتایا گیا کہ ریجنز کے 80 فیصد الیکشن مکمل ہوچکے، ریجنل انٹر ڈسٹرکٹ انڈر 19 کرکٹ ٹورنامنٹ 15 جون سے شروع ہورہا ہے۔
نجم سیٹھی کی جانب سے دی جانے والی بریفنگ میں بتایا گیا ایک سالہ کرکٹ کیلنڈر مکمل کرلیا گیا جس کا جلد اعلان کیا جائے گا، ڈیپارٹنمنٹل کرکٹ بحال ہوچکی ہے، تمام ڈیپارٹمنٹس نے اپنی کرکٹ ٹیمیں بنانا شروع کردی ہیں۔
ملاقات میں پی سی بی آئین بحالی پر وزیر اعظم شہباز شریف نے نجم سیٹھی کو مبارکباد دی۔
