اسلام آباد: وزیر اعظم اسلامی جمہوریہ پاکستان محمد شہباز شریف اور صدر مملکت آصف علی زرداری نے اقلیتوں کے قومی دن کے موقع پر پیغام دیا ہے۔
تفصیلات کے مطابق صدر مملکت آصف علی زرداری نے اپنے پیغام میں کہا ہے کہ قائداعظم کے اقلیتوں کے حقوق اور تحفظ کے وعدے پر قائم رہنے کے عزم کا اعادہ کرتے ہیں۔
انہوں نے کہا کہ اقلیتوں کو ملکی آئین میں ضمانت کردہ تمام سیاسی، معاشی، سماجی حقوق حاصل ہیں، اسلام اقلیتوں کے حقوق کے تحفظ کو مکمل طور پر تسلیم کرتاہے، ہم نے سرکاری ملازمتوں میں اقلیتوں کے لیے 5 فیصد کوٹہ مختص کیاہے۔
صدرمملکت نے کہا کہ پارلیمنٹ کے دونوں ایوانوں میں نشستیں مختص کی گئی ہیں، اقلیتی طلبا کو تعلیمی وظائف، عبادت گاہوں کیلئے فنڈز کے اقدامات کیے جارہے ہیں، پاکستان اقلیتوں کے حقوق کے تحفظ، زندگی میں آگے بڑھنے کے مساوی مواقع فراہم کریگا۔
وزیراعظم شہباز شریف نے کہا ملکی ترقی میں اقلیتوں کے شاندار کردار پر انہیں خراج تحسین پیش کرتا ہوں، قائداعظم نے 11 اگست 1947 کو اقلیتوں کیلئے مکمل مذہبی آزادی کا اعلان کیا تھا۔
شہباز شریف نے کہا کہ حکومت اقلیتی برادری کی فلاح وبہبود کے حوالے سے عملی اقدامات کررہی ہے، آئین کی روشنی میں اقلیتی برادری کیلئے مساوی حقوق یقینی بنارہی ہے، اقلیتوں کو بنیادی حقوق کی فراہمی، جان ومال کا تحفظ ریاست کی ذمہ داری ہے، حکومت اقلیتوں کے بنیادی حقوق، عزت، جان و مال کے تحفظ کیلئے پرعزم ہے۔
