لاہور: احتساب عدالت نے آشیانہ اقبال ہاؤسنگ اور رمضان شوگر مل کیس کی سماعت 25 مئی تک ملتوی کردی۔

تفصیلات کے مطابق لاہور کی احتساب عدالت میں آشیانہ اقبال ہاؤسنگ اسکیم اوررمضان شوگرمل کیس کی سماعت ہوئی۔

عدالت نے سماعت کے آغاز پراستفسار کیا کہ کیا شہباز شریف اورحمزہ شہباز موجود ہیں؟ جس پر وکیل نے جواب دیا کہ آج کی حاضری سے استثنیٰ کی درخواست دی ہے۔

احتساب عدالت نے ریمارکس دیے کہ شہباز شریف ملک سے باہر چلے گئے، انہوں نے ملک سے باہر جانے کی ٹرائل کورٹ سے اجازت نہیں لی۔

نیب وکیل نے دلائل دیتے ہوئے کہا کہ شہبازشریف نے عدالت کی کارروائی کا مذاق اڑایا ہے، شہبازشریف کے وکیل نے کہا کہ ان کے موکل کے بہت سے ٹیسٹ ہونا ہیں اس لیے ملک سے باہر ہیں۔

عدالت نے استفسار کیا کہ کیا یقین دہانی کرا سکتے ہیں کہ وہ 2 ہفتے بعد پیش ہوں گے جس پروکیل نے جواب دیا کہ جی !امید کی جاتی ہے کہ وہ علاج کے بعد پاکستان واپس آجائیں گے۔

نیب وکیل نے کہا کہ حاضری معافی کی درخواست کو مسترد کیا جائے، گزشتہ 3 سماعتوں سے وہ عدالت میں پیش نہیں ہو رہے۔

احتساب عدالت نے شہبازشریف اور حمزہ شہباز کی حاضری سے استثنیٰ کی درخواست منظور کرتے ہوئے کیس کی سماعت 25 مئی تک کے لیے ملتوی کردی۔