لندن : اپوزیشن لیڈر شہبازشریف نے کرونا وائرس کے پیش نظر ملک میں پبلک ہیلتھ ایمرجنسی کا مطالبہ کرتے ہوئے کہا ہے کہ کروناوائرس کوعالمی وباقرار دینے کے بعدحکومت سنجیدگی دکھائے ، مجرمانہ غفلت اور تاخیر کے بھیانک نتائج ہوسکتے ہیں۔
تفصیلات کے مطابق اپوزیشن لیڈر شہبازشریف نے کروناوائرس کے پیش نظر ملک میں پبلک ہیلتھ ایمرجنسی کا مطالبہ کردیا اور کہا کروناوائرس کوعالمی وباقرار دینے کے بعدحکومت سنجیدگی دکھائے اور اقدامات، انتظامات ، احتیاط وآگاہی پرمبنی حکمت عملی بنائی جائے۔
،شہبازشریف کا کہنا تھا کہ وزیراعلیٰ سندھ اور ان کی ٹیم کےتحفظات اور تشویش پر اقدامات کئے جائیں ، ذاتی سیاسی انتقام کوصحت امور میں لاناوزیراعظم کے منصب کی خلاف ورزی ہے۔
عمران خان نے کرونا کی عالمی وباپرایک اجلاس تک بلانےکی زحمت نہیں کی ، ہوائی اڈے،بندرگاہوں، داخلی راستوں پر وفاق کا کنٹرو ل ہے، ملک میں اسکریننگ ٹھیک ہوتی تو بعد میں مریض سامنے نہ آتے ۔
پوری دنیا کے سربراہان، وزرائےاعظم اعلیٰ سطح پرمتحرک ہیں، یہ قوم کی زندگی کا مسئلہ ہے، مجرمانہ رویہ رہا تو سنگین نتائج بھگتنے پڑیں گے ، ضروری فیصلے کرنے میں مجرمانہ غفلت اور تاخیر کے بھیانک نتائج ہوسکتے ہیں۔
یاد رہے عالمی ادارۂ صحت (ڈبلیو ایچ او) نے کرونا وائرس کو وبا قرار دے دیا ہے اور کہا اس سے پہلے کرونا کی وجہ سے اتنے بڑے پیمانے پر وبا نہیں دیکھی۔
