وفاق اور پنجاب میں حکومت سازی کیلیے نواز شریف کی سربراہی میں اہم بیٹھک ہوئی ہے شہباز شریف وزیراعظم اور مریم نواز وزیراعلیٰ پنجاب کیلیے مضبوط امیدوار ہیں۔
اے آر وائی نیوز کو ذرائع سے ملنے والی اطلاعات کے مطابق وفاق اور پنجاب میں حکومت سازی کے لیے سیاسی رابطے اور اہم بیٹھکیں جاری ہیں۔ لاہور جاتی امرا میں نواز شریف کی سربراہی میں وفاق اور پنجاب میں حکومت سازی پر غور کیا گیا ہے جس میں وفاق اور پنجاب میں حکومت بنانے کیلے ابتدائی خدوخال تیار کر لیے گئے ہیں۔
ذرائع نے بتایا کہ شہباز شریف وزیر اعظم اور مریم نواز وزیر اعلیٰ پنجاب کیلیے مضبوط امیدوار ہیں اور نواز شریف کی سربراہی میں ہونے والے اجلاس کے شرکا نے شہباز شریف کو وزیراعظم بنانے کی تجویز کی حمایت کرتے ہوئے انہیں اس عہدے کے لیے نامزد کرنے کی تجویز دے دی ہے۔
ذرائع کے مطابق ملک کے سب سے بڑے صوبے پنجاب کی وزارت اعلیٰ کے لیے قائد ن لیگ نواز شریف کی صاحبزادی مریم نواز اب تک مضبوط امیدوار ہیں۔
ذرائع نے بتایا کہ اس مشاورتی اجلاس کے بعد مسلم لیگ ن اپنے ممکنہ اتحادیوں پیپلز پارٹی، ایم کیو ایم پاکستان اور جے یو آئی (ف) کے سامنے یہ نام رکھے گی اور متفقہ فیصلے کے لیے ان سے حمایت حاصل کرنے کی کوشش کی جائے گی۔
