پاکستان ٹی ٹوئنٹی ٹیم کے کپتان شاہین شاہ آفریدی کا کہنا ہے کہ رواں سال ٹی ٹوئنٹی ورلڈ کپ کے لیے 16 سے 20 کھلاڑی تلاش کر لیے ہیں۔
رواں سال جون میں امریکا اور ویسٹ انڈیز کی مشترکہ میزبانی میں آئی سی سی ٹی 20 ورلڈ کپ کھیلا جائے گا جس کے لیے دنیائے کرکٹ پرجوش اور کرکٹنگ ممالک اپنی ٹیموں کی حتمی تشکیل میں مصروف ہیں۔ قومی کپتان شاہین شاہ آفریدی کا کہنا ہے کہ میگا ایونٹ کے لیے ممکنہ طور پر 16 سے 20 کھلاڑی تلاش کر لیے ہیں۔
لاہور میں میڈیا سے گفتگو کرتے ہوئے کہا کہ نیوزی لینڈ کے خلاف ابتدائی 4 میچوں میں پاکستان کی بیٹنگ نہیں چل سکی اور فیلڈنگ بھی اچھی نہیں ہوئی لیکن پانچویں ٹی ٹوئنٹی میں پاکستانی ٹیم متحد ہو کر کھیلی اور کامیابی حاصل کی جو ضروری تھا۔
ٹی ٹوئنٹی کپتان نے کہا کہ افتخار احمد تجربہ کار کھلاڑی ہیں جنہوں ںے آخری میچ میں عمدہ بولنگ کی جب کہ ہمارے پاس کئی نئے با صلاحیت نوجوان کرکٹرز بھی ہیں۔
ان کا کہنا تھا کہ صائم ایوب، عباس آفریدی، حسیب اللہ پاکستان کرکٹ کا مستقبل ہیں۔
شاہین شاہ نے کہا کہ صائم ایوب اگرچہ نیوزی لینڈ کے خلاف توقع کے مطابق کارکردگی پیش نہیں کر سکے لیکن اس میں پاکستان کے لیے شاندار کھیل دکھانے کی صلاحیت موجود ہے۔
کپتان نے کہا کہ عباس آفریدی ایک اچھا بولر ہونے کے ساتھ ساتھ ایک اچھا فیلڈر اور بیٹر بھی ہے، اُس کے آنے سے بولنگ لائن مضبوط ہوئی ہے اور موقع ملنے پر وہ پرفارم کرنے کیلئے تیار رہتا ہے۔
