پاکستان ٹیم کے اہم فاسٹ بولر شاہین شاہ آفریدی قومی مصروفیات کی وجہ سے انگلش ایونٹ دی ہنڈریڈ سے دستبردار ہو گئے۔
بائیں ہاتھ کے فاسٹ بولر ایونٹ کی تاریخوں میں قومی ٹیم کے ساتھ دورہ ویسٹ انڈیز پر ہوں گے اور انہوں نے نجی ایونٹ پر قومی ذمہ داری کو ترجیح دیتے ہوئے دی ہنڈریڈ سے دستبرداری اختیار کر لی ہے۔
شاہین آفریدی نے دی ہنڈریڈ کی فونکس سے معاہدہ کیا تھا تاہم وہ 21 جولائی سے 21 اگست تک قومی ٹیم کے ساتھ ہونے کی وجہ سے انگلش ایونٹ کا حصہ نہیں ہوں گے۔
اپنی عدم دستیابی کے حوالے سے شاہین آفریدی نے فونکس کو آگاہ کر دیا ہے۔ وہ بطور اوورسیز پلیئر فونکس کا حصہ بنے تھے۔
نیوزی لینڈ کے کپتان کین ولیمسن نے بھی دی ہنڈریڈ سے دستبرداری اختیار کرتے ہوئے کہا ہے کہ وہ انجری کی وجہ سے ایونٹ کے لیے دستیاب نہیں ہیں۔
حالانکہ ولیمسن اس وقت برطانیہ میں موجود ہیں اور انہوں نے حال ہی میں بھارت کے خلاف ورلڈٹیسٹ چیمپئن شپ کا فائنل کھیلا اور ٹیم کو چیمپئن بنانے میں کلیدی کردار ادا کیا۔
ولیمسن گزشتہ 6 ماہ سے کوہنی کی انجری کو لے کر آرام کو ترجیح دے رہے ہیں یہی وجہ ہے کہ انہوں نے انگلینڈ کے خلاف دوسرے ٹیسٹ میں شرکت نہیں کی تھی۔