لاہور: عالمی شہرت یافتہ قومی ٹیم کے فاسٹ باؤلر شاہین شاہ آفریدی کے گھر بیٹے کی پیدائش ہوئی ہے۔
اے آر وائی نیوز کے مطابق قومی ٹیم کے فاسٹ باؤلر شاہین شاہ آفریدی کے ہاں پہلے بچے کی پیدائش ہوئی ہے، جس پر وہ خوشی سے نہال ہیں، جبکہ انہو ں نے اپنے بیٹے کا نام ”علی یار” رکھا ہے۔
سابق کپتان شاہد آفریدی بھی خبر ملنے کے بعد خوشی سے سرشار ہیں کیونکہ وہ بھی نانا بن گئے ہیں۔
فاسٹ باؤلر کی شادی سابق کپتان شاہد آفریدی کی بیٹی سے ہوئی تھی، جو اس وقت راولپنڈی میں بنگلا دیش کیخلاف پہلا ٹیسٹ میچ کھیلنے میں مصروف ہیں۔
واضح رہے کہ پاکستانی کرکٹ ٹیم کے اسٹار فاسٹ باؤلر نے گزشتہ ماہ عمرے کی سعادت بھی حاصل کی تھی۔
فوٹو اینڈ شیئرنگ ایپ انسٹاگرام پر اپنی ایک تصویر شیئر کرتے ہوئے انہوں نے مداحوں کو عمرے کی ادائیگی سے متعلق آگاہ کیا تھا۔
تصویر میں دیکھا جاسکتا ہے کہ فاسٹ باؤلر احرام پہن کر حرم شریف میں کھڑے ہیں جبکہ ان کے پسِ منظر میں کعبے کا پُرنور منظر دیکھا جاسکتا ہے۔
