کشمیریوں سےاظہار یکجہتی، شاہد آفریدی نے فوج کیپ اورخاکی رنگ کی شرٹ پہن لی
مودی نے ہماری امن پالیسی کو کمزوری سمجھا،شاہدآفریدی
کراچی : مقبوضہ وادی کے مظلوم کشمیریوں سے یکجہتی کیلئےسابق کپتان شاہدآفریدی نے فوجی کیپ اور شرٹ پہن لی اور کہا میں اس ملک کافوجی ہوں، میں اور میرا خاندان کشمیر کے ساتھ کھڑا ہے، مودی نے ہماری امن پالیسی کو کمزوری سمجھا۔
تفصیلات کے مطابق وزیراعظم عمران خان کی اپیل پر ملک بھر میں پاکستان کے کروڑوں عوام کشمیریوں سے فقیدالمثال اظہار یکجہتی کا مظاہرہ کیا، سابق کپتان شاہد آفریدی کشمیریوں سے اظہاریکجہتی کیلئے مظاہرے میں فوجی ٹوپی اور شرٹ پہن کر شریک ہوئے۔
اس موقع پر شاہد آٖفریدی نے کہا کہ میں اس ملک کافوجی ہوں،میں اورمیراخاندان کشمیرکے ساتھ کھڑاہے، بھارت کیلئے ہمارے پختون بھائی ہی کافی ہیں۔
سابق کپتان کا کہنا تھا کہ مودی اوراس کے پیروکاروں نےبھارت کاامیج خراب کیا، پاک بھارت تعلقات مودی نےخراب کیےہیں، گجرات اوراب کشمیرمیں جوکچھ مودی کر رہا ہے یہ جہالت ہے۔
انھوں نے مزید کہا مودی نے ہماری امن پالیسی کو کمزوری سمجھا، کراچی سے خیبر تک شاہد آفریدی اور پوری قوم کشمیریوں کیساتھ ہے۔
یاد رہے دو روز قبل شاہد آفریدی نے کشمیریوں سے اظہار یکجہتی کے لیے جلد ایل او سی کےدورے کا اعلان کرتے ہوئے کہا تھا کہ 6ستمبر کو ایل او سی پر شہید ہونے والوں کے لواحقین سے ملاقات کریں گے۔
خیال رہے وزیراعظم عمران خان کی اپیل پر ملک بھر میں پاکستانیوں نے کشمیریوں سے یکجہتی کا اظہار کیا ، 12 بجے سائرن بجتے ہی قومی ترانے کے بعد کشمیرکا ترانہ پڑھاگیا، ٹریفک سگنلز بندہوگئے،ٹرینز بھی رک گئیں اور فضائی حدود بھی بندرہی۔
