لاہور: سابق وزیرِ اعظم شاہد خاقان عباسی نے غیر سرکاری غیر حتمی نتیجے کے مطابق این اے 124 لاہور سے کام یابی حاصل کر لی ہے، جیتنے کے بعد انھوں نے کہا کہ آج ہمارے لیے خوشی کا دن ہے۔
تفصیلات کے مطابق پاکستان مسلم لیگ ن کے رہنما شاہد خاقان عباسی سے این اے 124 سے پاکستان تحریکِ انصاف کے امیدوار کو شکست دے کر خوشی کا اظہار کیا، کہا اللہ کا شکر ہے تاریخی فتح حاصل ہوئی۔
غیر سرکاری غیر حتمی نتیجے کے مطابق شاہد خاقان عباسی نے 75012 ووٹ حاصل کیے، جب کہ پی ٹی آئی کے غلام محی الدین نے 30115 ووٹ حاصل کیے۔
شاہد خاقان عباسی نے ابتدائی نتائج کے بعد ہی اپنے حمایتیوں کو مٹھائی کھلانی شروع کر دی تھی، انھوں نے میڈیا سے گفتگو کرتے ہوئے کہا ’یہ لوگوں کی ن لیگ کے ساتھ محبت کا نتیجہ ہے۔‘
یہ بھی پڑھیں: براہ راست دیکھیں: ضمنی انتخابات 2018، 11 نشتوں کے غیر حتمی غیر سرکاری مکمل نتائج موصول
مسلم لیگ ن کے رہنما کا کہنا تھا کہ آج ووٹرز نے ثابت کر دیا کہ ن لیگ کا راستہ نہیں روکا جا سکتا، میں ن لیگی کارکنوں کا شکریہ ادا کرتا ہوں۔
شاہد خاقان عباسی نے غیر حتمی غیر سرکاری نتیجے کو دیکھ کر پی ٹی آئی حکومت پر کڑی تنقید کی، کہا وزیرِ اعظم عوام کا اعتماد کھو چکے ہیں۔
