لاہور: پنجاب کے سابق آئی جی جیل خانہ جات شاہد سلیم بیگ گھر واپس پہنچ گئے۔ ان کو دو روز قبل تحویل میں لیے جانے کی اطلاعات سامنے آئی تھیں۔
ذرائع نے اے آر وائی نیوز کو بتایا کہ شاہد سلیم بیگ کے گھریلو ملازمین نے بتایا کہ وہ دو دن سے گھر میں نہیں تھے جبکہ ان کا موبائل فون بھی بند تھا۔
ذرائع نے بتایا کہ سابق آئی جی جیل خانہ جات پنجاب کی اہلیہ سرکاری ملازم ہیں اور وہ بھی دو دن دفتر میں نہیں آئیں۔
شاہد سلیم بیگ نے آج حراست میں لیے جانے کی خبر کے کئی گھنٹے بعد ویڈیو جاری کی تھی جس میں انہوں نے اپنے حراست میں لینے کی خبر گھر میں چائے پیتے ہوئے دیکھی۔
تمام میڈیا نے سابق آئی جی جیل خانہ جات کی گرفتاری کی خبر نشر کی تھی۔
شاہد سلیم بیگ نے گھر میں چائے پیتے اور گرفتاری کی خبر دیکھتے ہوئے ویڈیو میں کہا کہ گھر میں چائے پیتے ہوئے اپنی ہی گرفتاری کی خبر دیکھ کر کیسا لگا؟
ان کا کہنا تھا کہ اپنے ہی متعلق غلط خبر سنتے ہوئے کیسا لگا اس کو کہتے ہیں زرد صحافت، یہ ہے پاکستان کا میڈیا، غلط خبریں سنیں اور چائے انجوائے کریں۔
