بالی ووڈ کے معروف اداکار شاہ رخ خان کے مداحوں کے لیے بری خبر ہے کہ کنگ خان اب ڈان 3 کا حصہ نہیں ہوں گے۔
بھارتی میڈیا رپورٹس کے مطابق پروڈیوسر رتیش سدھوانی نے ڈان 3 کے اسکرپٹ مکمل ہونے کی تصدیق کی ہے اور اس کے ساتھ میڈیا میں خبریں گردش کرنے لگی ہیں کہ کنگ شاہ رخ خان نے ڈان فرنچائز کو خیر باد کہنے کا فیصلہ کرلیا ہے۔
رپورٹ میں بتایا گیا ہے کہ فرحان اختر کی ڈان فرنچائز کے تیسرے سیکوئل میں شاہ رخ خان ڈان کا کردار نہیں نبھائیں گے تاہم اب یہ کردار کون نبھائے گا اس کی تفصیلات سامنے نہیں آسکی ہیں۔
بھارتی میڈیا کا دعویٰ ہے کہ ڈان 3 میں شاہ رخ خان کے بجائے ایک نئے اداکار کو ’ڈان‘ کے کردار کے لیے فلم میں کاسٹ کیا جارہا ہے۔
خیال رہے کہ فلم ’ڈان‘ کو اداکار اور فلمساز فرحان اختر نے ہدایت کاری دی تھی اور وہ باکس آفس پر بلاک بسٹر ثابت ہوئی تھی۔
2006 کو ریلیز ہونے والی یہ فلم 1978 میں ریلیز ہونے والی فلم ’ڈان‘ کی ری میک تھی جس میں پریانکا چوپڑا، ارجن رامپال، ایشا کپور، بومن ایرانی، پون ملہوترا، راجیش کھتر اور اوم پوری بھی شامل تھے۔
’ڈان‘ کی شاندار کامیابی کے بعد فرحان اختر اور رتیشن سدھوانی نے مل کر ’ڈان 2‘ بنائی جسے باکس آفس پر کامیابی ملی۔
