مانچسٹر: عوامی مسلم لیگ کے سربراہ شیخ رشید احمد نے کہا ہے کہ نواز شریف برطانیہ میں چھپ چھپ کر جی رہا ہے، پاکستان میں اب نئی حکومت اوورسیز والے بنائیں گے۔
یہ بات انہوں نے مانچسٹر میں اے آر وائی نیوز کے نمائندے زاہد نور سے خصوصی گفتگو کرتے ہوئے کہی، انہوں نے کہا کہ اگر نوازشریف خود ساختہ ہاؤس اریسٹ ہونے کے بجائے اپنے ملک میں جیل کاٹ لیتا تو اچھا ہوتا۔
شیخ رشید نے کہا کہ نوازشریف بیرون ملک جاکر چھپنے کے بجائے پاکستانی جیل کا برگر کھالیتا تو وہ زیادہ بہتر تھا اس کی یہاں پر کیا زندگی ہے؟ باہر نکلتاہے تو گالیاں پڑتی ہیں، پیروں میں مہندی لگا کر بیٹھا ہوا ہے۔ ،
ان کا کہنا تھا کہ آنے والے مہینوں مارچ اور اپریل میں عام انتخابات کی تاریخ اور اس کا شیڈول آجائے گا، اب نئی حکومت اوورسیز پاکستانی بنائیں گے۔
ایک سوال کے جواب میں شیخ رشید احمد نے کہا کہ میں یہ دیکھ رہا ہوں کہ جو نئی حکومت بنے گی وہ کیسے چلے گی کیونکہ معیشت کی حالت بہت خراب ہے۔
انہوں نے کہا کہ پی ٹی آئی کے جو35ارکان کے استعفے آج منظور کیے ہیں تو مزید 35اور گیٹ پر کھڑے ہیں، ان کو عقل10سال بعد آتی ہے، ان کی عقل پرماتم کرنے کو دل کرتا ہے، شیخ رشید
شیخ رشید کا کہنا تھا کہ ملک میں اب عام انتخابات ہونے جارہے ہیں اور اب اوورسیز پاکستانیوں کو بھی ووٹ کا حق مل جائے گا، ملک سے باہر اوورسیز کی صورت میں ایک کروڑ ووٹرز عمران خان کا موجود ہے۔
عوامی مسلم لیگ کے سربراہ کا مزید کہنا تھاکہ پی ڈی ایم والے اب ذلیل و رسوا ہوگئے ہیں، انہوں نے کہا کہ میڈیا کے خلاف کوئی کارروائی نہیں ہوسکتی کیونکہ میڈیا آزاد ہے۔
