بال شخصیت کے نکھار میں انتہائی اہمیت کے حامل ہیں، یہی وجہ ہے کہ مرد ہوں یا خواتین اپنے بالوں کا خیال لازمی رکھتے ہیں لیکن بعض لوگوں کے بالوں سے عجیب سی بو آتی ہے جو ذہنی اذیت کا باعث بنتی ہے۔
بالوں کو اچھے طریقے سے نہ دھونا، ان پر پسینے، دھول اور مٹی کا جمع ہونا، یہ تمام باتیں بالوں میں بدبو کا سبب بن سکتی ہیں لیکن اس سے چھٹکارا پانے کے بھی کچھ گھریلو طریقے موجود ہیں مندرجہ ذیل سطور میں ان طریقون کو بیان کیا گیا ہے۔
کون سا شیمپو بہتر ہے؟
عام طور پر بازاروں میں دستیاب شیمپو میں مضر صحت کیمیکل شامل کیے جاتے ہیں، جو بالوں کے ساتھ ساتھ سر کی جلد کو بھی نقصان دہ ہیں، اس لیے بہتر ہے کہ گھر کے تیار کردہ شیمپو کا استعمال کیا جائے جو قدرتی طریقے سے تیار ہونے کے باعث بالوں کی نشونما میں بھی اہم کردار ادا کر سکتے ہیں۔ اس ضمن میں شکاکائی شیمپو کا استعمال کیا جائے۔
شکا کائی شیمپو بنانے کے لیے شکا کائی، ریٹھے، املہ ، کڑھی پتے کو ایک پیالہ پانی میں رات بھر کے لیے بھگو کر رکھ دیں۔ اگلے دن ان تمام چیزوں کو پانی میں ابال لیں اور پھر ان چیزوں کو پس لیں۔ اسے شیمپو کے طور پر استعمال کرتے ہوئے سر کا مساج کریں۔ اور پھر انہیں سادہ پانی سے اچھی طرح کنگھال لیں۔
سیب کا سرکہ
دو کپ پانی میں دو سے تین کھانے کے چمچ ایپل سیڈر سرکہ کو ڈال کر ایک محلول تیار کر لیں۔ اب اس محلول سے بالوں کو شیمپو کرنے کے بعد دھو لیں اس سے نہ صرف جلد صاف ہوجاتی ہے، بلکہ بالوں میں موجود بیکٹریا کا بھی خاتمہ ہو جاتا ہے۔
لیموں کا استعمال
لیموں کھانے میں ذائقے اور دیگر گھریلو آئٹمز کو چمکانے کے ساتھ ساتھ بالوں کے لیے بھی مفید ہے۔ ایک کپ گرم پانی میں دو کھانے کے چمچ لیموں کا رس ملا لیں اور اس پانی کو بالوں میں شیمپو کرنے کے بعد دھولیں۔ لیموں کی مہک بالوں سے ناگوار بو کو دور کرنے میں مددگار ہوگی۔
