لاہور: سابق وزیر اعظم نواز شریف، ان کی صاحبزادی مریم نواز اور داماد کیپٹن صفدر کی پیرول پر رہائی میں 3 دن کی توسیع کردی گئی۔
تفصیلات کے مطابق سابق خاتون اول کلثوم نواز کے انتقال کے سبب ان کے شوہر نواز شریف، صاحبزادی مریم نواز اور داماد کیپٹن صفدر کی پیرول پر کی جانے والی رہائی میں توسیع منظور کرلی گئی۔
ایڈیشنل چیف سیکریٹری داخلہ نسیم نواز رہائی میں توسیع کی سمری لے کر وزیر اعلیٰ آفس پہنچے۔
مزید پڑھیں: ’امی آنکھیں کھولیں، دیکھیں ابو جان آئے ہیں‘
محکمہ داخلہ پنجاب کے مطابق نواز شریف، مریم نواز اور کیپٹن صفدر کی پیرول پر رہائی میں توسیع کا فیصلہ کرتے ہوئے سمری وزیر اعلیٰ پنجاب کو ارسال کردی گئی ہے۔
حکام کا کہنا ہے کہ وزیر اعلیٰ کی منظوری کے بعد نوٹیفکیشن جاری کر دیا جائے گا۔
خیال رہے کہ سابق خاتون اول بیگم کلثوم نواز طویل علالت کے بعد گزشتہ روز لندن میں انتقال کر گئی تھیں۔
اس موقع پر نواز شریف، ان کی صاحبزادی مریم نواز اور داماد کیپٹن صفدر کو 12 گھنٹے کے لیے پیرول پر رہا کیا گیا تھا جس کے بعد وہ جاتی امرا پہنچ گئے ہیں۔
نواز شریف کے خلاف العزیزیہ ریفرنس کیس کی سماعت بھی آج بغیر کارروائی ملتوی کردی گئی۔
دوسری جانب نواز شریف کے بھائی اور سابق وزیر اعلیٰ پنجاب شہباز شریف اپنی بھابھی کی میت لینے کے لیے لندن روانہ ہوچکے ہیں۔
وہ میت لے کر جمعہ کو وطن واپس آئیں گے جس کے بعد مرحومہ کلثوم نواز کو جاتی امرا میں سپرد خاک کیا جائے گا۔
