کراچی: وزیر اطلاعات سندھ شرجیل میمن کا کہنا ہے کہ پاکستان کو بحرانوں سے صرف آصف زرداری نکال سکتے ہیں۔
اے آر وائی نیوز کے مطابق کراچی میں تقریب سے خطاب کرتے ہوئے وزیر اطلاعات سندھ شرجیل میمن نے کہا کہ صدر آصف زرداری نے بدترین حالات میں بھی پاکستان کھپے کا نعرہ لگایا ہے، وہ اپنے بدترین مخالفین کو بھی ٹیبل پر بٹھانے کی بات کرتے ہیں۔
انہوں نے کہا کہ بلاول بھٹو نے کہا تھا کراچی ہم سب کا ہے، پی پی کے سوا کسی نے بدترین انتقامی کارروائی کا سامنا نہیں کیا اور جانوں کا نذرانہ نہیں دیا۔
شرجیل میمن نے کہا کہ یہ نہیں ہونا چاہیے کہ حکومت چلی جائے تو کسی سے بات چیت نہیں ہو، منفی سوچ کو ختم کرکے دل بڑا کرنا ہوگا، ہم سب محب وطن ہیں ہمیں ملک کو مضبوط کرنا ہے۔
صوبائی وزیر نے کہا کہ پاکستان کو اتحاد کی ضرورت ہے، ایسا نہ ہو کہیں دیر ہوجائے، ہمیں لوگوں کو حقیقت بتانے، بھائی کو بھائی سے جوڑنے کی ضرورت ہے۔
انہوں نے مزید کہا کہ اس وقت صحافی اور میڈیا بہتری کے لیے جو کردار ادا کرسکتا ہے وہ کوئی نہیں کرسکتا، جس خبر سے ملک یا کسی کا نقصان ہو تو اس سے گریز کرنا چاہیے، آزادی صحافت کے لیے ہم پہلے بھی کھڑے تھے اب بھی کھڑے رہیں گے۔
