کراچی: سابق صوبائی وزیر شرجیل میمن کو طبیعت میں بہتری پر اسپتال سے واپس کراچی سینٹرل جیل منتقل کردیا گیا۔

تفصیلات کے مطابق کرپشن کے الزام میں گرفتار شرجیل میمن جیل پہنچتے ہی ریڑھ کی ہڈی سمیت مختلف بیماریوں میں مبتلا ہوگئے تھے۔ تاہم اب طبیعت سنبھلنے پر انہیں واپس جیل روانہ کردیا گیا ہے۔

سابق صوبائی وزیر کو ریڑھ کی ہڈی میں تکلیف کے باعث اسپتال منتقل کیا گیا تھا۔ وہ بیماریوں کے باعث سہارے کے ذریعے پیشیوں پر لائے جاتے رہے۔

مزید پڑھیں: شرجیل میمن نے گرفتاری کو احتساب عدالت میں چیلنج کر دیا

میڈیکل رپورٹ کے مطابق ڈاکٹرز نے شرجیل میمن کے جگر میں بھی انفیکشن بتایا ہے۔ رپورٹ کے مطابق شرجیل میمن کا مکمل علاج نہ ہوا تو تکلیف شدت اختیار کر سکتی ہے۔

شرجیل میمن اس سے پہلے علاج کے لیے لندن اور دبئی میں بھی زیر علاج رہ چکے ہیں۔

یاد رہے کہ 23 اکتوبر کو قومی احتساب بیورو نے کرپشن کیس میں سابق وزیر اطلاعات سندھ شرجیل میمن کو گرفتار کیا تھا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔