کراچی : لاہور اور پشاور میں شوکت خانم اسپتال کے بعد اب کراچی میں کینسر کا سب سے بڑا اسپتال قائم کیا جارہا ہے جس کی تعمیر جلد مکمل کرلی جائے گی۔
شوکت خانم میموریل کینسر ہسپتال و ریسرچ سنٹر لاہور اور پشاور میں عوام کیلئے خدمات سرانجام دے رہے ہیں اور اب کراچی میں ان دونوں ہسپتالوں سے بھی بڑا تیسرا ہسپتال بننے جارہا ہے۔
اس حوالے سے اے آر وائی نیوز کے پروگرام باخبر سویرا میں شوکت خانم ہسپتال کے چیف میڈیکل آفیسر ڈاکٹر محمد عاصم یوسف نے منصوبے کی تفصیلات سے آگاہ کیا۔
انہوں نے بتایا کہ کراچی کا اسپتال سائز میں لاہور کے اسپتال سے دوگنا بڑا ہے اور اس میں موجود سہولیات بھی دگنی ہیں کیونکہ یہاں نہ صرف کراچی بلکہ اندرون سندھ اور جنوبی بلوچستان سے بھی مریض آئیں گے اور یہاں بھی 75فیصد مریضوں کا علاج مفت کیا جائے گا۔
ڈاکٹر محمد عاصم یوسف نے بتایا کہ ہماری کوشش ہے کہ سال 2024 کے آخر تک اس کا تمام کام مکمل کرلیا جائے،
انہوں نے بتایا کہ کینسر کا علاج اکثر ایک طویل اور صبر آزما عمل ہوتا ہے اور دوران ِ علاج بہت سارے مریضوں کو دور دراز کے علاقوں سے جسمانی ، جذباتی اور معاشی طور پر مشکلات برداشت کرتے ہوئے وقتاً فوقتاً ہسپتال تک کا سفر کرنا پڑتا ہے۔
