کراچی: بنارس چورنگی میں رفاہی پلاٹ پر قبضہ کر کے غیر قانونی دکانیں بنانے کے کیس میں عدالت نے پلاٹ خالی کرانے کا حکم دے دیا۔
تفصیلات کے مطابق سندھ ہائیکورٹ نے کراچی کے علاقے بنارس چورنگی پر بنی غیر قانونی دکانوں کے کیس کی سماعت کرتے ہوئے رفاہی پلاٹ خالی کرانے کا حکم دے دیا ہے۔
عدالت نے کہا کہ تجاوزات کا خاتمہ کیا جائے اور گرین بیلٹ بحال کی جائے، درخواست گزار ذاکر کے مطابق بنارس چورنگی 43 سو مربع گز پر واقع ہے، یہ اسکیم 27 کا حصہ ہے، لیکن اسکیم 28 کی جعلی دستاویزات کی آڑ میں یہ دکانیں بنائی گئی ہیں۔
درخواست گزار نے عدالت سے استدعا کی کہ غیر قانونی دکانیں منہدم کر کے یہاں پارک بنایا جائے تاکہ علاقے کے نوجوانوں کو مثبت سرگرمیوں کے لیے جگہ دستیاب ہو۔
درخواست میں سیکریٹری لوکل گورنمنٹ، ایس بی سی اے، کے ڈی اے کے سربراہوں کو فریق بنایا گیا ہے، درخواست میں اینٹی کرپشن اسٹیبلشمنٹ، اینٹی انکروچمنٹ سیل اور آئی جی پولیس کو بھی فریق بنایا گیا ہے۔
