کراچی : سندھ ہائی کورٹ نے سانحہ بلدیہ فیکٹری کیس میں اصل ملزمان کو تحفظ دینے پر برہمی کا اظہار کرتے ہوئے کہا رؤف صدیقی اوردیگر کی بریت کے خلاف ریاست نے اپیل دائر کیوں نہ کی؟
تفصیلات کے مطابق سندھ ہائی کورٹ میں سانحہ بلدیہ فیکٹری کیس سے متعلق سماعت ہوئی ، دوران سماعت ملزمان کی بریت کے خلاف اپیل دائر نہ کرنے پرعدالت نے برہمی کا اظہار کیا۔
جسٹس کےکےآغا نے ریمارکس دیئے کہ اتنے بڑے کیس میں بڑی مچھلیوں کو کیسے بچالیا گیا؟ رؤف صدیقی اوردیگر کی بریت کے خلاف ریاست نے اپیل دائر کیوں نہ کی؟ لگتاہے کیس میں ملوث بڑی مچھلیوں کوجان بوجھ کر بچایا گیا اور اصل ملزمان کو بچانے کے لیے تحفظ دیا گیا ہے۔
عدالت کا کہنا تھا کہ جوملزمان ٹرائل کورٹ سے بری ہوئے ان کی بریت کوچیلنج کیوں نہیں کیا گیا؟ ملزمان کے خلاف اپیل دائر نہ کرنے والوں کے خلاف کارروائی کی جائےگی۔
جسٹس کےکے آغا کا اپنے ریمارکس میں کہنا تھا کہ جاؤ اور بڑوں سے ہدایت لے کر آؤ ، بڑے لوگوں کو چھوڑدیا غریبوں کو اندر ڈال دیا گیا ہے۔
بعد ازاں سندھ ہائی کورٹ میں سانحہ بلدیہ فیکٹری کیس سے متعلق سماعت ملتوی کردی گئی۔
