کراچی : سندھ ہائی کورٹ نے کراچی بھر سے چار ہفتوں میں تمام سائن بورڈز ہٹانے کا حکم دے دیا اور خبردار کیا عدالتی احکامات پر عملدرآمد نہ کیا گیا تو توہین عدالت کی کارروائی کی جائے گی۔
تفصیلات کے مطابق سندھ ہائیکورٹ میں سرکاری املاک اور عوامی مقامات پر سائن بورڈز،سیاسی بینرز اور اشتہارات لگانے کا کیس پر سماعت ہوئی۔
سپریم کورٹ کے احکامات پر عملدرآمد نہ کرنے پر سندھ ہائیکورٹ نے مئیر کراچی اور دیگر پر برہمی کا اظہار کیا۔
عدالت نے کے ایم سی، کے ڈی اے، ڈی ایچ اے، کنٹونمنٹ بورڈز اور دیگر کو شہر بھر سائن بورڈ ہٹانے اور سپریم کورٹ کے حکم کی روشنی میں احکامات پر عملدرآمد کرکے رپورٹ پیش کرنے کا بھی حکم دیا۔
عدالت نے کہا کہ چار ہفتوں میں عدالتی احکامات پر عملدرآمد نہ کیا گیا تو مئیر کراچی، ڈی جی کے ڈی اے اور دیگر کے خلاف توہین عدالت کی کارروائی کی جائے گی۔
عدالت نے غیر قانونی بورڈ لگانے والوں کے خلاف مقدمات درج کرانے کا حکم دیتے ہوئے کہا کہ جس نے بھی غیر قانونی بورڈز لگائے ہوئے ہیں، ان کے خلاف مقدمات درج کرکے رپورٹ پیش کی جائے حکم کے باوجود بینرز ہٹائے گئے اور نا ہی مقدمات درج کیے گئے۔
وکیل درخواست گزار نے کہا کہ سپریم کورٹ نے سرکاری املاک پر سائن بورڈ ہٹانے کا حکم دیا تھا جبکہ کے ایم سی نے اپنے رولز میں سرکاری املاک پر سائن بورڈ لگانے میں شامل کردیا۔
