کراچی: سندھ ہائیکورٹ نے بانی متحدہ قومی موومنٹ (ایم کیو ایم) کی تقریر پر پابندی ختم کرنے کی درخواست مسترد کردی۔
سندھ ہائیکورٹ نے بانی متحدہ قومی موومنٹ کی تقریر پر پابندی کے خلاف درخواست پر سماعت کرتے ہوئے بانی ایم کیو ایم کی تقریر پر پابندی ختم کرنے کی درخواست مسترد کردی۔
درخواست گزار محمد آفتاب الدین بقائی درخواست کے قابل سماعت ہونے پر عدالت کو مطمئن نہیں کرسکے، درخواست میں وفاقی حکومت ،سیکریٹری قانون ، سیکریٹری انفارمیشن اور پیمرا کو فریق بنایا گیا تھا۔
درخواست گزار کا کہنا ہے کہ بیرون ملک ملازمت کے بعد وطن واپس پہنچا تو پتہ چلا بانی ایم کیو ایم کی تقریر پر پابندی ہے، بانی ایم کیو ایم نے ہمشہ غریب اور متوسطہ طبقے کی بات کی ہے، وہ جمہوریت، حقیقت پسندی، برابری اور انصاف کے حامی ہیں۔
درخواست گزار نے عدالت کو کہا کہ بانی ایم کیو ایم نے مہاجروں کے حق کی بات ہے، بانی ایم کیو ایم نے مہاجر قومی موومنٹ کو متحدہ قومی موومنٹ میں تبدیل کیا انہوں نے غریب اور متوسط طبقے کے لیے فلاحی کام بھی کیے ہیں۔
درخواست گزار محمد آفتاب الدین بقائی نے کہا کہ بانی کیو ایم پر پاکستان اور بیرون ملک اشتعال انگیز تقاریر کا ایک بھی مقدمہ ثابت نہیں ہوا ہے، بانی ایم کیو ایم اپنی 22 اگست 2016 کی تقریر پر معافی مانگ چکے ہیں۔
درخواست میں استدعا کی گئی کہ بانی ایم کیو ایم کی تقریر پر پابندی ختم کرنے کا حکم دیا جائے۔
