اسلام آباد: وزیر اعظم شہباز شریف نے شرح نمو میں پائیدار بہتری کیلیے صنعت کاروں و کاروباری شخصیات سے تجاویز مانگ لیں جبکہ کاروباری شخصیات و صنعت کاروں اور حکومتی وزرا پر مشتمل کمیٹی تشکیل دینے کی ہدایت کر دی جو دو ہفتوں کے اندر پائیدار شرح نمو کے حصول کے حوالے سے حکومت کو تجاویز دے گی۔
وزیر اعظم سے ممتاز صنعت کاروں و کاروباری شخصیات پر مشتمل وفد نے ملاقات کی، وفد نے حکومتی معاشی پالیسیوں اور معاشی اشاروں میں بہتری کی تعریف کی جبکہ پرائیویٹائزیشن اور ڈی ریگولیشن پالیسی کو سراہا۔
اس موقع پر شہباز شریف نے کہا کہ حکومت صنعت و کاروبار کے فروغ کیلیے ترجیحی بنیادوں پر کام کر رہی ہے، کاروباری برادری اور صنعت کاروں کو درپیش مسائل کا حل اولین ترجیح ہے، ملک میں کاروبار اور سرمایہ کار دوست پالیسیوں کی فراہمی کیلیے کوشاں ہیں۔
شہباز شریف نے کہا کہ ایس آئی ایف سی کی صورت میں آسان اور سہل پلیٹ فورم مہیا کیا گیا ہے، ایس آئی ایف سی میں ون ونڈو آپریشن کے تحت سہولتیں فراہم کی جا رہی ہیں۔
انہوں نے بتایا کہ ایف بی آر کی ڈیجیٹائزیشن کے حوالے سے ایک بڑا کام مکمل کر لیا گیا ہے، فیس لیس کسٹمز اسسمنٹ سسٹم کے ذریعے شفافیت کو فروغ ملا ہے، معاشی ٹیم کی کوششوں کی بدولت میکرو اکنامک حالات میں خاطر خواہ بہتری آئی، مائیکرو اکنامک سطح پر بہتری کیلیے مزید محنت کرنی ہے تاکہ ثمرات عوام تک پہنچ سکیں۔
’حکومت کی کوشش ہے پائیدار ترقی کے اہداف کو پورا کیا جائے، پچھلے ایک سال میں براہ راست بیرونی سرمایہ کاری کیلیے معاملات تیزی سے آگے بڑھے ہیں، حکومت کی ترجیح ایسے شعبے ہیں جن میں سرمایہ کاری کی بدولت برآمدات میں اضافہ ہو، آذربائیجان اور ازبکستان کے دوروں میں سرمایہ کاری کے کئی معاہدوں پر دستخط ہوئے، ملک کی شرح نمو کو برآمدات کے ذریعے بڑھانا ہی بہترین راستہ ہے۔‘
