لاہور: سابق وزیر اعلیٰ پنجاب اور مسلم لیگ ن کے صدر شہباز شریف نے کہا ہے کہ نواز شریف کے ساتھ غیر مہذب سلوک بند کیا جائے۔
ان خیالات کا اظہار انہوں نے نگراں وزیر اعظم ناصرالمک کو لکھے گئے اپنے خط میں کیا، خط میں شہباز شریف نے نواز شریف کی بکتر بند گاڑی میں عدالت منتقلی پر تحفظات کا اظہار کیا۔
خط میں کہا گیا ہے کہ نواز شریف کے ساتھ ایسا سلوک نہیں ہونا چاہیے، ان پر کرپشن کا الزام نہیں، ایک سیاسی قیدی ہیں۔
نگراں وزیر اعظم کو لکھے گئے خط میں مزید کہا گیا تھا کہ امید ہے حکومت ایسے نازیبا سلوک کا سنجیدگی سے نوٹس لے گی۔
خیال رہے کہ احتساب عدالت نے سزا یافتہ سابق وزیراعظم نوازشریف کے خلاف العزیزیہ اورفلیگ شپ ریفرنسز کی سماعت 15 اگست تک ملتوی کردی ہے۔
نوازشریف کے خلاف نیب ریفرنسز کی سماعت 15 اگست تک ملتوی
واضح رہے کہ احتساب عدالت کی جانب سے 6 جولائی کو ایون فیلڈ ریفرنس میں نواشریف کو 11، مریم نواز کو 8 اور کیپٹن صفدر کو ایک سال قید کی سزا سنائی گئی تھی۔
نوازشریف اور ان کی بیٹی مریم نواز 13 جولائی کو جب لندن سے وطن واپس لوٹے تو دونوں کولاہور ایئرپورٹ پرطیارے سے ہی گرفتار کرکے اڈیالہ جیل منتقل کردیا گیا تھا۔
علاوہ ازیں مسلم لیگ ن کی جانب سے اڈیالہ جیل انتظامیہ سے متعلق بھی تحٖفظات کا اظہار کیا جاتا رہا ہے، بہتر سہولیات نہ ہونے کی بھی شکاتیں سامنے آئی ہیں۔
