اسلام آباد: مسلم لیگ ن کی پارلیمانی پارٹی کا اجلاس ہوا جس میں نواز شریف کے کیسز اور جوڈیشل پروسیسنگ میں تاخیر پر اظہار تشویش کیا گیا۔
تفصیلات کے مطابق مسلم لیگ ن کی پارلیمانی پارٹی کا اجلاس شہباز شریف کی زیر صدارت ہوا۔
اجلاس کے آغاز پر مسلم لیگ ن کے صدر شہباز شریف نے تلاوت قرآن پاک کے دوران سب سے چھوٹی سورت سورۃ الکوثر پڑھنے کی کوشش کی لیکن آخر میں چند الفاظ بھول گئے جس کے بعد اسے ایسے ہی ادھورا چھوڑ دیا۔
اجلاس میں نواز شریف کے کیسز اور جوڈیشل پروسیسنگ میں تاخیر پر اظہار تشویش کیا گیا۔ اجلاس میں الیکشن میں ہونے والے مبینہ دھاندلی پر کمیشن بنانے کے مطالبے سے پیچھے نہ ہٹنے کا فیصلہ کیا گیا۔
اجلاس میں وزیر اعظم عمران خان اور چیئرمین نیب کی ملاقات کو مفادات کا ٹکراؤ قرار دیا گیا۔ پارلیمانی پارٹی کا کہنا تھا کہ جس کا خود نیب میں کیس ہو وہ کیسے نیب کے چیئرمین سے مل سکتا ہے۔
مسلم لیگ ن کے اجلاس میں تارکین وطن کی ضمنی الیکشن میں ووٹنگ کا معاملہ مسترد کردیا گیا۔ پارلیمانی کمیٹی نے اقتصادی رابطہ کمیٹی کے بجلی مہنگی کرنے کی تجویز پر بھی تشویش کا اظہار کیا۔
پارلیمانی کمیٹی کا کہنا تھا کہ سی پیک کے فنڈز کی بندش اور مغربی روٹ پر کام روک دیا گیا۔
پارلیمانی کمیٹی نے لوکل گورنمنٹ نظام ختم کرنے کے اعلان پر کنونشن کا فیصلہ بھی کیا۔ کمیٹی کا کہنا تھا کہ بلدیاتی نمائندوں کو آئینی مدت پوری کرنی چاہیئے۔
کمیٹی نے خارجہ پالیسی پر حکومتی اقدامات کو مضحکہ خیز قرار دیا۔
