اسلام آباد: وزیر اعظم شہباز شریف کا کہنا ہے کہ مذاکرات سے گریز غیر جمہوری رویہ ہے، یہ کشیدگی پیدا کرتا ہے اور قومی یکجہتی کی فضا متاثر ہوتی ہے۔
وزیر اعظم سے حکومتی مذاکراتی کمیٹی کے رکن سینیٹر عرفان صدیقی نے ملاقات کی اور ان کو پی ٹی آئی کمیٹی سے مذاکرات سے آگاہ کیا۔
یہ بھی پڑھیں: عمران خان نے مذاکرات ختم کرنے کا اعلان کیوں کیا؟
اس موقع پر شہباز شریف نے کہا کہ سیاسی جماعتوں کے رابطے اور مذاکرات جمہوریت کی روح ہیں، رابطوں سے ملک اور قوم کو درپیش مسائل حل کرنے اور مشترکہ لائحہ عمل تیار کرنے میں مدد ملتی ہے۔
انہوں نے کہا کہ پاکستان کو ہنگاموں، محاذ آرائی اور تصادم کی نہیں بلکہ مفاہمت کی ضرورت ہے، معاشی بحالی اور دہشتگردی کے خاتمے کیلیے مشترکہ حکمت عملی اختیار کرنی چاہیے۔
ان کا کہنا تھا کہ اللہ کے فضل و کرم سے ملک ترقی کر رہا ہے، عالمی سطح پر بھی پاکستان کے وقار میں اضافہ ہو رہا ہے، غیر جمہوری رویوں سے تعمیر و ترقی میں رکاوٹ ڈالنے کی اجازت نہیں دیں گے۔
23 جنوری 2025 کو پی ٹی آئی نے حکومت کے ساتھ مذاکرات ختم کرنے کا اعلان کیا تھا۔ چیئرمین پی ٹی آئی بیرسٹر گوہر نے میڈیا سے گفتگو میں کہا تھا کہ عمران خان سے میری اور وکلا کی ملاقات ہوئی انہوں نے مذاکرات ختم کرنے کا اعلان کر دیا ہے۔
بیرسٹر گوہر کا کہنا تھا کہ جوڈیشل کمیشن کیلیے حکومت کو 7 دن دیے تھے اور ہم نے کہا تھا کہ اگر حکومت نے کمیشن کا اعلان نہ کیا تو مذاکرات کا اگلا دور نہیں ہوگا۔
ان کا کہنا تھا کہ سیاسی اختلافات کی ٹھنڈک اتنی زیادہ ہے کہ برف پگھل نہیں رہی، افسوس ہے حکومت کی طرف سے آج تک کوئی اعلان نہیں کیا گیا، عمران خان نے کہا ہے آج کی تاریخ تک حکومت نے کمیشن بنانے کا اعلان نہیں کیا تو کوئی بات نہیں ہوگی۔
