لاہور: وفاقی وزیر منصوبہ بندی احسن اقبال کا کہنا ہے کہ وزیر اعظم شہباز شریف جلد قوم کے سامنے معشی بحالی کا منصوبہ رکھیں گے۔
احسن اقبال نے ایک تقریب سے خطاب کے دوران کہا کہ عوام کو بجلی بلوں میں ریلیف دینے کیلیے کوشاں ہیں، ملکی مسائل کے حل کیلیے سب کو اپنا کردار ادا کرنا ہوگا، پاکستان ہر قسم کے وسائل سے مالا مال ہے۔
وفاقی وزیر نے کہا کہ پاکستان میں ٹیلنٹ کی کوئی کمی نہیں ہے، پاکستانیوں نے دنیا کے ہر شعبے میں اپنی صلاحیتوں کا لوہا منوایا ہے۔
انہوں نے کہا کہ فیک نیوز آج کا سب سے بڑا چیلنج ہے جس سے نوجوانوں کو گمراہ کرنے کی کوشش کی گئی، نفرت اور الزامات کی سیاست کا خاتمہ ہونا چاہیے، آج انتشار نہیں اتحاد کی ضرورت ہے۔
یاد رہے کہ 14 اگست سے قبل وزیر اعظم شہباز شریف نے قوم کو امید اور خوشیاں دینے کا ٹاسک دیتے ہوئے وزارتوں اور محکموں میں امید افزا اقدامات کی حکمت عملی کی ہدایت کی تھی۔
حکومتی ذرائع نے اے آر وائی نیوز کو بتایا تھا کہ وزارت خزانہ نے وزیر اعظم شہباز شریف کی ہدایت پر مہنگائی میں کمی اور معاشی استحکام کیلیے نئی حکمت عملی تیار کر لی جس میں معاشی پلان کے تحت معاشی شرح نمو میں اضافہ، مہنگائی اور مالیاتی خسارہ کم کیا جائے گا۔
ذرائع نے بتایا تھا کہ معیشت کی پائیدار ترقی کیلیے برطانوی معیشت دان کی نگرانی میں 5 سالہ پلان تیار کر لیا گیا جو 14 اگست کو جاری کیے جانے کا امکان ہے، منصوبے کا افتتاح وزیر اعظم شہباز شریف کریں گے۔
وزارت خزانہ کے حکام نے بتایا تھا کہ سال 2028 تک سالانہ 6 فیصد معاشی ترقی کا ہدف تجویز کیا گیا ہے جبکہ اصلاحات سے برآمدات سال 2028 تک 60 ارب ڈالر تک لے جانے کی تجویز اور نجی سرمایہ کاری کا فروغ اور برآمدات میں اضافہ ترجیح قرار دی گئی ہے۔
حکومتی ذرائع کے مطابق اصلاحات پر کامیاب عملدرآمد سے سالانہ روزگار کے 10 لاکھ مواقع پیدا ہونے کا تخمینہ لگایا گیا، مجوزہ پلان میں توانائی اور کاروباری لاگت میں کمی کی تجویز بھی شامل ہے۔
پلان میں چین سے ٹیکنالوجی کی پاکستان منتقلی کی تجویز دی گئی ہے جبکہ دوست ملک کے ساتھ جوائنٹ وینچرز کے ذریعے برآمدات کو فروغ دینے کی سفارش بھی شامل ہے۔
ٹیکس ٹو جی ڈی پی 13.5 فیصد اور سرمایہ کاری و برآمدات 15 فیصد تک بڑھانے کی تجویز ہے۔ ذرائع نے بتایا تھا کہ مجوزہ منصوبے پر عملدرآمد کیلیے سیاسی استحکام ضروری قرار دیا گیا ہے۔
