اسلام آباد: وزیر اعظم شہباز شریف نے اپنی حکومت کو ایک سال مکمل ہونے پر کابینہ میں شامل ارکان کی کارکردگی کا جائزہ لینے کا فیصلہ کر لیا۔
ذرائع نے اے آر وائی نیوز کو بتایا کہ وزیر اعظم شہباز شریف وزارتوں اور محکموں کی کارکردگی رپورٹ خود جانچیں گے، کارکردگی رپورٹ کیلیے انہوں نے ہدایت نامہ تمام وزارتوں بھجوا دیا ہے۔
یہ بھی پڑھیں: مذاکرات سے گریز غیر جمہوری رویہ ہے، وزیر اعظم
شہباز شریف نے گزشتہ ایک سال میں ہونے والے ریفارمز پر عملدرآمد رپورٹ طلب کی ہے جبکہ ایک سال کے دوران دی گئی نوکریوں کی تفصیلات بھی مانگ لی ہے۔
مراسلے میں کہا گیا کہ وزارتوں اور اداروں کی 12 ماہ میں اصلاحات کی تفصیلات فراہم کی جائیں، پالیسی تبدیلی، ڈھانچہ جاتی ایڈجسٹمنٹ اور گورننس میں اضافہ پر بریف کریں۔
ذرائع کے مطابق سرکاری اداروں میں اصلاحات لانے میں کتنی کامیابی ملی وزارتوں جواب دیں گی، وفاقی حکومت اس سال 1 لاکھ 50 ہزار خالی سیٹوں کو ختم کر دے گی، سرکاری محکموں میں ڈیلی ویجز کی سیٹیں بھی ختم کر دی جائیں گی۔
گزشتہ روز وزیر اعظم شہباز شریف نے ارکان پارلیمنٹ کی تنخواہوں میں اضافے کی منظوری دی تھی جس کا اطلاق یکم جنوری 2025 سے کر دیا گیا۔
تنخواہوں میں اضافے کی منظوری کے بعد ایک رکن پارلیمنٹ کے اکاؤنٹ میں 5 لاکھ 19 ہزار روپے منتقل کر دیے گئے۔ اسپیکر قومی اسمبلی ایاز صادق کی تنخواہ میں اضافہ نہیں ہوا لہٰذا وہ 2 لاکھ 18 ہزار روپے وصول کریں گے۔
اسی طرح، ڈپٹی اسپیکر قومی اسمبلی کی تنخواہ میں بھی اضافہ نہیں کیا گیا۔ ذرائع نے بتایا تھا کہ اسپیکر اور ڈپٹی اسپیکر کی تنخواہ فنانس کمیٹی نہیں بڑھا سکتی۔
