اسلام آباد: وزیر اعظم شہباز شریف کا کہنا ہے کہ 2018 میں قائم نااہل حکومت نے دہشتگردی کیخلاف جنگ سے حاصل ثمرات کو ضائع کیا اور اس نے نیشنل ایکشن پلان پر عملدرآمد روکا، قوم جو آج خمیازہ بھگت رہی ہے وہ اسی پالیسی کا نتیجہ ہے۔

وزیر اعظم نے قومی سلامتی کی پارلیمانی کمیٹی کے اجلاس میں گفتگو کرتے ہوئے قومی نوعیت کے اہم اجلاس میں اپوزیشن کی عدم شرکت کو افسوسناک اور حزب اختلاف کی غیر موجودگی کو غیر سنجیدہ طرز عمل قرار دیا۔

شہباز شریف نے کہا کہ حزب اختلاف کی عدم شرکت قومی ذمہ داریوں سے منہ موڑنے کے مترادف ہے، ان کی ذمہ داریاں قوم کی مقدس امانت ہیں، دہشتگردی کے خلاف سب کو متحدہ ہو کر آگے بڑھنا ہے، ملک کیلیے جان کا نذرانہ دینے والے جوانوں کے اہلخانہ ہماری طرف دیکھ رہے ہیں۔

گفتگو میں وزیر اعظم نے اہم شخصیات کی دہشتگردی کے خلاف جنگ میں لازوال قربانیوں کا ذکر کیا۔

انہوں نے کہا کہ دسمبر 2014 میں سانحہ اے پی ایس کے بعد سابق وزیر اعظم نواز شریف نے قوم کو متحد کیا، پوری قوم نے مل کر دہشتگردی کے ناسور کو جڑ سے اکھاڑ پھینکا، افواج پاکستان، سکیورٹی ادارے، سیاستدان اور شہریوں نے لازوال قربانیاں دیں، 2 دہائیوں میں دہشتگردی کی جنگ سے معیشت کو 150 ارب ڈالر سے زائد کا نقصان ہوا، قربانیوں کی بدولت پاکستان کا امن بحال ہوا، معیشت سنبھلی اور رونقیں بحال ہوئیں۔

ان کا کہنا تھا کہ پاکستان آج فیصلہ کن موڑ پر کھڑا ہے، دہشتگردی کو پھر سے جڑ سے اکھاڑ پھینکنے کیلیے ہم سب کو آہنی عزم کا کا اعادہ کرنا ہوگا، دہشتگردوں کا اصل نشانہ عوام کا اتحاد ہے، حال ہی میں جعفر ایکسپریس پر دہشتگرد حملے کا افسوسناک واقعہ پیش آیا، فوجی جوانوں و افسران نے پیشہ ورانہ مہارت سے سیکڑوں جانیں بچائیں۔

وزیر اعظم نے افواج پاکستان بالخصوص آرمی چیف جنرل عاصم منیر اور سکیورٹی اداروں کو خراج تحسین کیا۔

شہباز شریف نے کہا کہ ادارے دشمن عناصر کے ناپاک عزائم کو ناکام بنا رہے ہیں، آج کی فیصلہ کن گھڑی تقاضا کرتی ہے کہ ہم سوال کریں کہ کون کس کے ساتھ کھڑا ہے؟ آج ملک کے 25 کروڑ عوام پاکستان اور سلامتی کے محافظوں کے ساتھ کھڑے ہیں، جو ملک، قوم، افواج پاکستان، شہیدوں و غازیوں کے ساتھ نہیں وہ دہشتگرد کا ساتھی اور اتحادی ہے۔

ان کا کہنا تھا کہ سوشل میڈیا پر پروپیگنڈے سے فوج اور عوام میں دراڑ ڈالنے کی مزموم کوشش کی جا رہی ہے، فوج اور عوام ایک ہیں، ان کے درمیان دراڑ ڈالنے کی سازش پہلے کامیاب ہوئی اور نہ آئندہ ہوگی، ایسے شر پسند عناصر کی مزموم کوششیں کبھی کامیاب نہیں ہونے دیں گے۔

انہوں نے مزید کہا کہ پاکستان کا حصول ہمارے اسلاف کی لاکھوں قربانیوں کے بعد ممکن ہوا، ہم ان کی قربانیوں کو کبھی رائیگان نہیں جانے دیں گے، پاکستان ہے تو ہم سب ہیں، ہماری سیاست ہے۔